Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 66 Hüküm no: 77 Orijinal metin no: [26-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâric-i Galata’da Hoca Ali mahallesinde ölen reis-i mücellidân Mehmed Çelebi b. Ahmed’in evinin oğlu Süleyman’a intikal ettiği Hâric-i Galata’da Hoca Ali mahallesinde fevt olan reis-i mücellidân Mehmed Çelebi b. Ahmed nâm müteveffânın oğlu Süleyman ve kızı Meryem ve sagīresi Sâliha’nın vasîsi olan fahrü’l-a‘yân İlyas Çelebi b. İbrahim nâm kimesneler meclis-i şer‘a gelip müteveffâ-yı mezbûrun mahalle-i mezbûrede tarafeyni vasiyy-i mezbûr mülküne ve bir tarafı Kurdoğlu Memisi demekle ma‘rûf kimesne mülküne ve bir tarafı tarîk-i âma müntehî olan menzilinin taksîm olunmasını taleb ettiklerinde menzil-i mezbûrun üzerine varılıp ehl-i hibre ma‘rifetiyle dört sehm kılınıp mezbûretân Sâliha ve Meryem mülklerine ve bir tarafı Kurdoğlu Memisi mülküne ve bir tarafı tarîk-i âma muttasıl olan men[zil] iki sehmdir bir ocaklı fevkānî evi suffasıyla ve bir ocaklı tahtâ[nî] evi önünde bir odayı müştemildir işbu hudûd ile mahdûd ve mevsû[f] olan menzil li’z-zekeri mislü hazzi’l-ünseyeyn muktezâsınca merkūm Süleyman Çelebi’[ye] ta‘yîn olundukda mezkûr dahi hüsn-i rızâsıyla kabûl ettikden sonra mâ hüve’l-vâki‘ talebiyle ketb olunup yedine ver[ild]i ki vakt-i hâcetde müzekki[r-i mâ cerâ] ola. Hurrire fî evâili Cumâdelûlâ sene hamse ve semânîn ve tis‘a mi’e. Şuhûdü’l-hâl: Mehmed Çelebi b. Hüseyin el-İmâm, Mustafa Çelebi Reis-i mücellidân, el-Hâc Mehmed b. Abdullah, Behram b. Abdullah, el-Hâc Ferruh b. Abdullah, Murad Bey b. Abdullah, Mehmed Bey b. Karagöz el-Bevvâb, el-Hâc Mustafa el-Bevvâb, Mehmed ve Mustafa ibney Mustafa, Hasan Çelebi b. Ahmed