Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 67 Hüküm no: 78 Orijinal metin no: [27-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Abdullah’ın evin yarı hissesini karısından satın aldığı Galata ve Havâss-ı Kostantıniyye’de beytülmâl-i hâs emîni olan Mustafa Çelebi b. Yusuf mahfil-i kazâya Yenihisar’da Şah Mehmed Çelebi mahallesinde fevt olan ( ) nâm müteveffâtın zevci İbrahim b. Abdullah muvâcehesinde takrîr-i merâm edip müteveffât-ı mezbûrenin metrûkâtının nısfı beytülmâle âid olup öyle [olsa] mezbûrenin mahalle-i mezbûrede inde’l-cîrân ma‘lûmü’l-hudûd evinin nısfı dahi beytülmâle âid iken beytülmâl için tasarrufuma mâni‘ olur dedikde ba‘de’s-suâl mezbûr zikr olan evinin nısfı benim ve nısfı zevcem mezbûrenin idi lâkin mezbûreden iştirâ ettim idi iki bin akçeye deyû cevâb verdikde cevâbına muvâfık beyyine taleb olundukda Abdülkerim b. Murad el-İmâm ve Nasuh b. Abdullah el-Cündî müteveffât-ı mezbûre zikr olan evin nısfı ki mezbûrenin idi nısf-ı mezbûru bâ‘isü’s-sicil İbrahim’e iki bin akçe[ye] bey‘ edip semenini alıp kabz eyledi şâhidleriz şehâdet dahi ederiz dediklerinde şehâdetleri ba‘de’t-ta‘dîl hayyiz-i kabûlde vâki‘ olup sicil olundu. Şuhûdü’l-hâl: Kurd Bey b. Abdullah el-Cündî, Rıdvan Bey b. Abdullah el-Cündî, Hüseyin Bey b. Abdullah er-Râcil ve gayruhüm mine’l-hâzırîn