Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 109 Hüküm no: 183 Orijinal metin no: [57-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todor v. Todor nâm zimmî ile Haydar Ağa b. Abdurrahman’ın aralarındaki bağ satışından çıkan ihtilafta sulh olmaları Todor v. Todor nâm zimmî, meclis-i [şer‘de] işbu hâmilü’l-kitâb fahrü’l-a‘yân müteferrika zümresinden Haydar Ağa b. Abdurrahman mahzarında ikrâr ve i‘tirâf edip mukaddemâ mezkûr Haydar Ağa’dan hâric-i Galata’da Pelitçik kurbunda vâki‘ olup bir cânibi kapıcı Sinan b. Abdullah mülküne ve bir cânibi dahi Derviş Çelebi b. Hasan mülküne ve bir cânibi Martin Yahudi mülküne ve bir cânibi tarîk-i âma müntehî olan bir bağı cemî‘-i tevâbi‘ ve levâhıkıyla yirmi bin akçeye iştirâ edip üç bin akçesin verip bâkī on yedi bin akçesin sene hamse ve semânîn ve tis‘a mi’e’de vâki‘ olan Kasım gününde verecek olup eğer zikr olunan Kasım gününde vermezsem bey‘imiz bey‘ olmasın deyû hîn-i akidde şart eylemiş idik zikr olunan Kasım gününde teslîme kādir olmayıp âciz olmağın zikr olunan bağdan şart-ı mezkûr üzre ferâgat mezkûr Haydar Ağa dahi sene-i mezbûrede kabz ettiğim mahsûle müte‘allik da‘vâdan benim zimmetimi ibrâ eyleyip ve teslîm ettiğim üç bin akçeyi dahi bana yine teslîm eyledi ben kabz edip ve sene sitte ve semânîn ve tis‘a mi’e’de zikr olunan bağın bel‘ine ve zirâ‘atine ettiğim harcdan arz-ı hâliyesine ekdiğim hubûbâtdan ferâgat edip husûs-ı mezbûra müte‘allik da‘vâdan ve bi’l-cümle küllî ve cüz’î zikr olunan bağ harcına ve hubûbâta vesâir umûra müte‘allik olan da‘vâlardan zimmetini ibrâ ve iskāt eyledim mezkûr Ağa dahi bağ mahsûlüne vesâir husûsa müte‘allik olan da‘vâdan benim zimmetimi ibrâ eyledi biri birimiz ile min ba‘d da‘vâmız ve nizâ‘ımız yoktur dedikde mukırr-ı merkūmu mukarrun lehü’l-mezbûr vicâhen tasdîk eyleyip kayd olundu. Fî evâhiri Safer sene 986. Şuhûdü’l-hâl: Mehmed b. Selâmet el-İmâm, Ahmed Çelebi b. Şeyh Mehmed, Ali b. Abdullah el-Kâtib, Ahmed Bey b. Abdullah el-Kâtib, Mahmud b. Abdullah, Sefer Kethüdâ Kâtib-i mahzen, Hüsrev Ağa b. Abdullah, Ahmed Bey b. Abdullah, Mustafa b. Yusuf el-Muhzır ve gayruhüm mine’l-hâzırîn