Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 110 Hüküm no: 184 Orijinal metin no: [58-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Memi Reis ve Âişe bt. İskender’in kendilerine intikal eden evdeki hisselerini Ali Çelebi b. Memi Reis’e sattıkları Fâtıma bt. Memi Reis ve Âişe bt. İskender taraflarından husûs-ı âti’z-zikri ikrâra Mehmed b. Abdullah er-Reis ve Mustafa Reis b. Abdullah şehâdetleri ile vekâleti sâbit Mustafa b. İbrahim meclis-i şer‘-i şerîfde işbu hâmilü’l-kitâb Ali Çelebi b. Memi Reis mahzarında ikrâr ve i‘tirâf edip mahrûse-i Galata’da Şehsuvar mahallesinde vâki‘ olup iki beyt-i süflî ve üç beyt-i ulvî ve muhavvatayı müştemil olup bir cânibi Nisâ Hâtun bt. Sinan mülküne ve iki tarafı Fâtıma Hâtun bt. Veli mülküne ve bir cânibi tarîk-i hâssa müntehî olan menzillerin müvekkilem mezbûre Fâtıma’ya babasından intikāl eden rub‘ hissesi mezbûr Ali Çelebi’ye dört bin iki yüz kırk dört akçeye bey‘ edip semen-i merkūmu bi’t-tamâm alıp kabz ve menzil-i mezbûrdan Naime’ye intikāl eden rub‘ hisse mezbûre Naime fevt olup mezkûretân müvekkilelerim ile merkūm Ali Çelebi’ye intikāl etmiş idi zikr olunan Naime hissesin dahi mezbûre Naime’nin nafakası deyni için mesfûretân müvekkilelerim rızâlarıyla mezkûr Ali Çelebi’ye kendi hissesiyle bile dört bin iki yüz kırk dört akçe hesâbı üzre verip mezbûre Âişe Naime’nin nafaka-i mefrûzası için kendiye âid olacak bin yedi yüz kırk akçesin alıp kabz eyledikden sonra bâkī kalan meblağdan bi hasebi’l-kısme dört yüz kırk beş akçe dahi südüs alıp ve mezbûre Fâtıma dahi bâkī kalan meblağdan bi hasebi’l-kısme nısf hisse bin üç yüz otuz yedi akçe alıp menzil-i mezbûrda mezkûretân müvekkilelerimin bi vechin mine’l-vücûh hisseleri kalmadı zikr olunan menziller ve sâir muhallefâta müte‘allik olan da‘vâdan mezkûr Ali Çelebi’nin zimmetini ibrâ eylediler dedikde mukırr-ı merkūmu mukarrun-leh vicâhen tasdîk edip kayd olundu. Şuhûdü’l-hâl: Mehmed b. Mehmed el-Müezzin, Mustafa b. Hasan, Ömer b. Ali, Mehmed b. el-Hâc Abdullah, Mehmed Reis b. Bâli, el-Hâc Mehmed b. Habib el-Muhzır, Mustafa b. Yusuf el-Muhzır