Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 119 Hüküm no: 208 Orijinal metin no: [65-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. Abdülmennân’ın alacak iddiasının kabulü Aynî bt. Abdülmennân nâm hâtun müteveffâ zevci Sinan b. Hasan’ın kızı Şem‘î ve Ahmed b. Hasan b. Sinan nâm sagīrinin kıbel-i şer‘den vasîsi olan Hamza Bey b. Abdullah’ı meclis-i şer‘-i şerîfe ihzâr ve mahzarında da‘vâ ve takrîr-i merâm edip mukaddemâ mezbûr Sinan’dan mahrûse-i Kostantıniyye’de Davud Paşa mahallesinde altı bin akçeye bir menzil iştirâ edip meblağ-ı mezbûr teslîm edip ve menzil-i mezkûru kabz edip ba‘dehû mezkûr Sinan fevt olucak menzil-i mezkûra Hasan nâm kimesne müstehık çıkıp menzil-i mezbûr şer‘le mezkûr Hasan’a hükm olunup zikr olunan altı bin akçe mesfûr Sinan’ın zimmetinde kalmışdır hâlâ muhallefâtından taleb ederim deyip mezbûrân Hamza Bey ve Şem‘î’ye suâl olundukda inkâr birle cevâb vermeğin müddeiyye-i mezbûreden sıdk-ı makāli üzre beyyine taleb olundukda udûl-i müslimînden ve sikāt-ı muvahhidînden Hasan Halîfe b. Ali el-İmâm ve Ahmed Halîfe b. Abdullah da‘vâsına mutâbık ve takrîrine muvâfık edâ-i şehâdet-i şer‘iyye ettiklerinde şehâdetleri hayyiz-i kabûlde vâki‘ olup meblağ-ı mezbûr mezkûr Sinan’ın muhallefâtından hükm olunup bi’t-taleb kayd olunup sûreti yed-i tâlibe def‘ olundu. Tahrîren fî evâhiri Saferi’l-muzaffer sene 986. Şuhûdü’l-hâl: İbrahim b. Abdullah en-Nâzır, el-Hâc Ali b. Abdullah, Memi Reis b. Abdullah, Mehmed Çelebi b. Mustafa ve Mustafa b. Mehmed ve Mustafa b. Yusuf el-Muhzır