Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 120 Hüküm no: 211 Orijinal metin no: [66-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Bâli’nin Şem‘î bt. Sinan’ın zimmetini ibrâ ettiği Mustafa b. Bâli nâm kimesne meclis-i şer‘-i şerîfde işbu hâmiletü’l-kitâb Şem‘î bt. Sinan nâm hâtun mahzarında ikrâr ve i‘tirâf edip hazret-i Ebî Eyyûb Ensârî tevâbi‘inden Kasımpaşa mahallesinde vâki‘ olup bir cânibi Ahmed Bey b. Abdullah mülküne ve bir cânibi Yasemin bt. Abdullah mülküne ve bir cânibi tarîk-i hâssa ve bir cânibi tarîk-i âma müntehî olan menzili mukaddemâ mezbûre Şem‘î, Hızır Çelebi b. ( ) nâm kimesneye bey‘ edip ve mezbûr Hızır Çelebi dahi yedi bin akçeye bana bey‘ edip ba‘zı binâlar ihdâs ettiğimden sonra Ümmügülsüm bt. Mehmed nâm Hâtun menzil-i mezkûra müstehık çıkıp şer‘le elimden aldıkdan sonra menzil-i mezbûrun semenine ve binânın kıymetine mezbûr Hızır Çelebi’ye mürâca‘at ettiğimde mezbûre Şem‘î’den altı bin yedi yüz akçe ev bahâsından ve dört bin iki yüz doksan akçe binâ kıymetinden cem‘an on bin dokuz yüz doksan akçe olur cümlemizin rızâsıyla havâle-i şer‘iyye edip ben dahi havâleyi kabûl etmiş idim hâlâ mezbûre Şem‘î elinden yedi bin üç yüz yetmiş akçe alıp bâkīsinden zimmetini ibrâ eyledim ve bi’l-cümle menzil-i mezbûra ve binâya ve sâir mu‘âmelâta müte‘allik olan küllî ve cüz’î da‘vâlardan mezbûre Şem‘î’nin zimmetini ibrâ ve iskāt eyledim min ba‘d bi vechin mine’l-vücûh ve sebebin mine’l-esbâb da‘vâm ve nizâ‘ım yoktur dediği kayd olundu. Şuhûdü’l-hâl: Mustafa b. Abdullah, Ahmed b. Abdullah Topçu, Mahmud b. Abdullah, el-Hâc Hasan b. Kılağuz, Hamza Bey b. Abdullah, Musa Çelebi b. Mustafa, Mehmed Çelebi b. Mustafa, Mustafa b. Yusuf el-Muhzır ve Mustafa b. Kerim el-Muhzır ve gayruhüm mine’l-hâzırîn