Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 120 Hüküm no: 210 Orijinal metin no: [65-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şem‘î bt. Sinan ile Ümmügülsüm bt. Mehmed’in nafaka, mehir ve evle ilgili daavalarda sulh oldukları Şem‘î bt. Sinan meclis-i şer‘de Ümmügülsüm bt. Mehmed mahzarında ikrâr [edip] mezbûre Ümmügülsüm sagīre iken nafaka takdîr ettirip iki bin sekiz yüz akçe nafaka-i mefrûze isbât edip ve altı bin akçe dahi sâbıkan zevcim Mehmed zimmetinde mehr-i müeccelimden kalıp cem‘an sekiz bin sekiz yüz akçe olur mezbûre Ümmügülsüm mesfûr Mehmed’in muhallefâtın kabz eylemeğin Ümmügülsüm’den taleb etmiş idim hâlâ muslihûn tavassutuyla Ümmügülsüm elinden bin sekiz yüz akçe bedel-i sulh alıp zikr olunan nafakaya ve mehr-i müeccele ve Eyyûb-i Ensârî’de vâki‘ olan Ümmügülsüm elinde olan menzile müte‘allik da‘vâ [dan] zimmetini ibrâ eyledim dedikde Ümmügülsüm dahi mezkûr Sinan sâbıkan bana vasî olup ba‘zı kitâblar ve esbâblarını bey‘ [edip] iki bin yedi yüz akçe hâsıl olup zimmetinde kalmışdır deyû da‘vâ eylemiş idi hâlâ ol dahi babası mezkûr Mehmed’in cemî‘-i muhallefâtına müte‘allik da‘vâdan benim zimmetimi ve Aynî Hâtun’un zimmetini ve Ahmed b. Hasan’ın zimmetini ibrâ eyledi dedikde mukırra-i merkūmeyi mesfûre Ümmügülsüm cemî‘-i ikrârında tasdîk edip bi’t-taleb kayd olundu. Şuhûdü’l-hâl: Hamza Bey b. Abdullah el-Mütevellî, Receb b. Abdurrahman, Ahmed b. Abdullah, Musa Çelebi b. Mustafa, Mehmed Çelebi b. Mustafa, İbrahim Halîfe el-Kâtib