Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 127 Hüküm no: 222 Orijinal metin no: [73-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’nın, vasîsi İbrahim b. Ahmed’den tüm alacaklarını aldığına dair ikrarı Bundan akdem fevt olup verâseti oğlu Mehmed nâm sagīre münhasıra olan Mustafa b. Abdullah nâm reisin oğlu mezbûr Mehmed, meclis-i şer‘-i şerîfde bülûğa lâyık olan sinde olduğu hâlde bülûğuna ikrâr-ı sahîh-i şer‘î ile ikrâr ve i‘tirâf ettikden sonra vasiyy-i muhtârı olan İbrahim b. Ahmed mahzarında meclis-i şer‘de ikrâr ve takrîr-i kelâm edip sâbıkan mezbûr babam Mustafa fevt oldukda bana irs-i şer‘î ile kassâm defteri mûcebince on üç bin akçe intikāl edip mezbûr vasî meblağ-ı mezbûru kabz etmiş idi. Hâlâ zikr olunan meblağdan mezbûr vasînin hâric-i Galata’da Balıkpazarı’nda vâki‘ olup bir tarafdan sâhil-i bahr ile ve bir tarafından tarîk-i âm ile ve bir tarafından Reyhan b. Abdullah dükkânı ile ve bir tarafından demirci Andriye dükkânı ile mahdûd olan dükkânda olan attâr esbâbı ki cem‘îsi tafsîlen ma‘lûm olmağın ta‘ayyünden müstağnîlerdir ve dükkân-ı mezbûrun harc-ı ma‘kūlünü beş bin yüz akçesine tuta alıp kabz eyledim ve beş bin üç yüz on dokuz akçesin dahi nakid alıp kabz eyledim ve üç bin dört yüz altmış akçesin dahi vasiyy-i mezbûr üzerine nâzır olan Haydar Reis b. Abdullah zimmetinden kabûl eyledim ve bi’l-cümle vasiyy-i mezbûr yedinde babamdan bana irs ile intikāl eyleyen malımın cem‘îsi tarîk-i mezbûr ile alıp kabz edip mezbûr vasîmin zimmetinde bir habbe bâkī kalmadı dedikde mukırr-ı mezbûru mezkûr vasî bi’l-muvâcehe tasdîk edicek mâ hüve’l-bâkī bi’t-taleb ketb olunup kayd olundu.