Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 61 Hüküm no: 39 Orijinal metin no: [6b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad b. Abdullah Reis’in vasiyeti Ali Bey b. Abdullah ve Ahmed b. Abdullah nâm kimesneler, Halkulvâdi muhârebesinde fevt olan Ferhad b. Abdullah Reis’in sagīreynine vasiyy-i muhtâr olan Hürrem b. Abdullah Reis ve Haydar b. Abdullah mahzarlarında, hâmiletü hâze’l-kitâb Hatice b. Abdullah nâm mu‘takadan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müddeiyye-i mezbûrenin efendisi müteveffâ-yı mezbûr, müddeiyye-i mezkûreye râyicü’l-vakt bin sekiz yüz akçe vasiyyet etti. Şehâdetleri ba‘de ri‘âyeti şerâiti’l-kabûl ve ba‘de’t-ta‘dîl ve’t-tezkiyye inde’ş-şer‘ makbûl ve mû‘teber olmağın mûcebince hükm edildi. Mezbûrân, müteveffâ-yı mesfûrun sülüs-i malından meblağ-ı merkūmu ona teslîm etti. Mu‘taka-i mezkûre de meblağ-ı merkūmu ikisinden ahz ü kabz etti. Şuhûdü’l-hâl: Mehmed Çelebi b. Haydar, İskender b. Abdullah, Ferhad Bey b. Abdullah, Ahmed Bey b. Abdullah, Hasan b. Abdullah ve gayruhüm mine’l-hâzırîn.