Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 72 Hüküm no: 61 Orijinal metin no: [11b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Bey’in, Andriye v. Köni ve Yorgi v. Petro ile koyun ticaretinde ortak oldukları, terekesinden ortakların paylarının verilmesi Oldur ki Mahmiye-i Galata ve havâss-ı Kostantıniyye’de Cebeciler beytülmâl emîni olup Kiremitlik’de fevt olan Mehmed Bey’in muhallefâtını kabz eden fahrü’l-ümenâ Mehmed Bey b. Hamza ve kâtibi Mehmed Bey b. Ahmedî işbu bâ‘iseyi’l-kitâb Andriye v. Köni ve Yorgi v. Petro nâm zimmîler meclis-i şer‘-i şerîfde müteveffâ-yı mezbûrun zevcesi Rahime bt. ( ) tarafından vekîl-i şer‘î olan Ali b. Ömer ve tenfîz-i sülüs vesâyâsına vasiyy-i şer‘î olan Ahmed b. ( ) nâm kimesneleri ihzâr ve takrîr-i kelâm edip müteveffâ-yı mezbûrun hâl-i hayâtında şerîki olup şirket üzre koyun alıp satmak üzre alıp bey‘ ettiğimiz koyunun akçesin der kîse eyleyip ve vedî‘a komuş iken emîn-i mezbûr kabz eyleyip zabt etmişdir bi hasebi’ş-şer‘ hakkımız taleb ederiz dediklerinde gıbbe’s-suâl mezbûrdan emîn ve vekîl ve vasî inkârıyla [12a] cevâb verdiklerinde müdde‘iyân-ı mezbûrân şirket ve keyfiyyet-i şirketlerine istişhâd olundukda udûl-i müslimînden Kiremitlik mahallesinde Siyâmi b. Mustafa el-Müezzin ve Ali b. Ömer ve Hüseyin b. Abdullah li ecli’ş-şehâde hâzırûn olup mezbûrûn müteveffâ-yı merkūmun şerîkleridir ve keyfiyyet-i şirketleri münâsafa üzredir müteveffâ-yı mezbûr maraz-ı mevtinde dahi huzûrumuzda mezbûrân Andriye ve Yorgi şerîklerimdir ribh-i mâlın dâhilinde nısf-ı mâl mezbûrânın hakkıdır henüz taksîm olunmayıp der kîse olup müveddâ‘dır deyû i‘tirâf edip bizi işhâd etmişdir şâhidleriz şehâdet dahi ederiz dediklerinde gıbbe’t-tezkiyye ve’t-ta‘dîl şehâdetleri hayyiz-i kabûlde vâki‘ oldukdan sonra mezbûrân müdde‘îler mâl-ı şirketi küllen ve ba‘zen kabz ve istîfâ ve ibrâ etmediklerine tahlîf-i billâh olundukdan sonra mûceb-i şehâdetleriyle mâl-ı şirket hesâb olundukda yirmi bin üç yüz iki nısf zuhûr etmeğin edâsıyla hükm olunduğu bi’t-taleb ketb ve imlâ olunup yed-i tâlibine vaz‘ ve def‘ olundu. Hurrire fî evâhiri şehri Cumâdelâhire sene semânîn ve seb‘în ve tis‘a mi’e. Şuhûdü’l-hâl: Musli el-Muhzır, Hüsrev el-Muhzır, Mustafa el-Muhzır.