Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 73 Hüküm no: 62 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Bey’in, Apostol ile koyun ticaretinde ortak olduğu, terekesinden ortağın payının verilmesi Mahmiye-i Galata ve havâss-ı Kostantıniyye’de Cebeciler beytülmâl emîni olup Kiremitlik’de fevt olan Mehmed Bey’in muhallefâtın kabz eden fahrü’l-akrân Mehmed Bey b. Hamza ve kâtibi Mehmed Bey b. Hamdi işbu râfi‘ü’l-kitâb Apostol v. ( ) nâm zimmî meclis-i şer‘de müteveffâ-yı mezbûrun zevcesi Rahime bt. Mehmed tarafından vekîl-i şer‘î olan Ali b. Ömer ve tenfîz-i sülüs vesâyâsına ve vasiyy-i şer‘î olan Ahmed b. Mehmed nâm kimesneleri ihzâr ve takrîr-i kelâm edip müteveffâ-yı mezbûrun hâl-i hayâtında şerîki olur şirket üzre koyun alıp satmak üzre alıp bey‘ ettiğimiz koyunun akçesin der kîse eyleyip ve vedî‘a komuş iken emîn-i mezbûrun kabz eyleyip zabt etmişdir bi hasebi’ş-şer‘ hakkımdır taleb ederim dedikde gıbbe’s-suâl mezbûre emîn ve vekîl ve vasî inkâr ile cevâb verdiklerinde müdde‘î-i mezbûr şirket ve keyfiyyet-i şirkete istişhâd olundukda udûl-i müslimînden Kiremitlik mahallesinden Siyâmi b. Mustafa el-Müezzin ve Ali b. Ömer ve Hüseyin b. Abdullah li ecli’ş-şehâde hâzırân olup mezbûr müteveffâ-yı merkūmun şerîkidir ve keyfiyyet-i şirketi tüs‘ üzredir müteveffâ-yı mezbûr maraz-ı mevtinde dahi huzûrumuzda mezbûr Apostol şerîkimdir [12b] ribh-i mâlından tüs‘-i mezbûrun hakkıdır henüz taksîm olunmayıp der kîse olup müveddâ‘dır deyû i‘tirâf edip bizi işhâd etmişdir şâhidleriz şehâdet dahi ederiz dediklerinde gıbbe’t-tezkiyye ve’t-ta‘dîl şehâdetleri hayyiz-i kabûlde vâki‘ oldukdan sonra mezbûr müdde‘î mâl-ı şirketi küllen ve ba‘zen kabz ve istîfâ ve ibrâ etmediklerine tahlîf billâh olundukdan sonra mûceb-i şehâdetleriyle mâl-ı şirket hesâb olundukda beş bin iki yüz kırk beş akçe tüs‘ zuhûr etmeğin meblağ-ı mezbûrun edâsıyla hükm olunduğu bi’t-taleb ketb ve imlâ olunup yed-i tâlibe vaz‘ ve def‘ olundu. Hurrire fi’t-târihi’l-mezbûr. Şuhûdü’ [l-hâl] : es-Sâbikūn.