Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 86 Hüküm no: 82 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hatice Hâtun’dan kalan çiftliğin satışı Kasaba-i Beşiktaş’da sâkin olan işbu râfi‘ü’l-kitâb, sâhibü’l-izzi ve’l-ikbâl Cafer Paşa b. Abdülmennân’ın taht-ı nikâhında fevt olan merhûme ve mağfûrun-lehâ Hatice Hâtun’un akabince vefât eden Mehmed Bey b. Davud Paşa ve Âişe bt. Davud Paşa nâm sadrî veledlerinin li eb karındaşı ve vârisi olan fahrü’l-emâcid Ahmed Bey b. Davud Paşa meclis-i şer‘-i kavîm ve mahfil-i dîn-i müstakīmde takrîr-i kelâm edip mûrisemiz merhûme-i merhûmeden intikāl eden esbâb-ı emlâkden ba‘zısını bey‘ etmeyip hissemizden mahsûb olmak üzre uhdemize almışdık cümleden Yenişehir müzâfâtından karye-i Umran’da olan çiftliği cemî‘ tevâbi‘ ve levâhıkı ve müştemilâtı ve kâffe-i hukūk ve lühûkuyla mûmâ-ileyh paşa hazreti yüz altmış bin akçeye ki nısfı seksen bin akçe eder alıp kabûl ve kabz etmişlerdi ben dahi hüsn-i rızâyla verip da‘vâ ve nizâ‘ım kalmamışdı hîn-i kısmetde meblağ-ı mezbûr hesaplaşıp merkūm çiftlik hakk-ı sarf ve mâl-ı mahzları olmuşdur [19b] deyicek bi’l-muvâcehe Cafer Paşa dahi tasdîk eyledikden sonra i‘tirâfı bi’t-taleb kayd-ı sicil olunup bu vesîka-i enîka yed-i tâlibe def‘ olundu ki lede’l-ihtiyâc ihticâc edineler. Tahrîren fî evâili Rebî‘ilevvel min şühûri sene semânîn ve tis‘în ve tis‘a mi’e. Şuhûdü’l-hâl: Hüseyin Kethüdâ b. Abdullah et-Tımışvarî, Hüseyin Bey b. Abdülmennân, Kasım Bey b. Abdullah, el-Hâc Osman b. Abdullah, Hasan Halîfe b. Abdullah el-Kâtib, fahrü’l-akrân Sefer Kethüdâ b. Abdülmennân, el-Hâc Hamza b. Abdullah, el-Hâc İskender b. Abdullah ve gayruhüm mine’l-hâzırîn.