Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 87 Hüküm no: 83 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Satılan evin Kamer Hâtun’un vakfı olduğu Sebeb-i tahrîr-i sicil ve hüccet nisâb oldur ki Fahrü’l-muhadderât zahrü’l-muvakkarât merhûme Hatice Hâtun bt. Hüseyin Paşa’nın veresesinden zevci olan sâhibü’l-izzi ve’l-ikbâl, sâhib-i zeyli’l-câh ve’l-celâl Cafer Paşa b. Abdülmennân ile merhûme-i merkūmeden sonra intikāl eden ibn-i sadrîsi Mehmed Bey b. Davud Paşa’nın li eb karındaşı ve vârisi olan fahrü’l-emâcid Ahmed Bey b. Davud Paşa meclis-i şer‘-i şâmihü’l-erkâna hâzırân olup fahrü’l-emâcidi’l-kirâm Mahmud Bey b. Hüseyin Paşa’yı ihzâr eylediklerinde takrîr-i da‘vâ edip merhûme-i merkūmenin vâlidesi Kamer Hâtun’dan vârislerine intikāl edip Nevbethâne mahallesinde vâki‘ olup ma‘lûmü’l-hudûd olan saray merkūme Hatice Hâtun ve karındaşı mezbûr Mahmud Bey’den ve karındaşı Mustafa Bey’den hisselerin dört yük akçeye iştirâ eyleyip cem‘an mülkü olmuşken hâlâ saray-ı mezbûru bey‘a tesaddî etmişdik merkūme Kamer Hâtun’un evlâd-ı evlâd olan vakfıdır deyû mezbûr Mahmud Bey mülkiyyet üzre bey‘ ve tasarrufumuza mâni‘ olur suâl olunmasın taleb ederiz dedikde gıbbe’s-suâl mezbûr Mahmud Bey takrîr-i kelâm edip [20a] fi’l-hakīka menzil-i mezbûr vâlidem merkūme Kamer Hâtun’un vakf-ı evlâdiyyet nehc-i şer‘î üzre vakf edip ve tescîl-i şer‘î ve sakk-ı mer‘î dahi ihrâc olmuşdur bir tarîkle sehv ve hatâ edip verese ittifâkla bey‘ etmişidi deyip sene sitte ve semânîn ve tis‘a mi’e Şevvâli’yle müverrah ve târih-i mezbûrda kassâm-ı askerî olan fahrü’l-ulemâ’i’l-kirâm Abdülvehhâb Efendi b. İbrahim Efendi’nin imzâsıyla mümzâ takrîr-i meşrûhuna muvâfık vakfiye ibrâz edicek mezbûrân Cafer Paşa ve Ahmed Bey vakfiyyet ve mazmûnun inkâr eylediklerinde gıbbe’l-istişhâdi’ş-şer‘î udûl-i müslimînden Ömer Halîfe b. Yunus el-İmâm ve el-Hâc Kasım b. Abdullah ve el-Hâc Ali b. Abdullah ve İskender b. Abdullah ve el-Hâc Hasan b. Abdullah el-Kâtib li ecli’ş-şehâde hâzırûn olup saray-ı mezbûr merkūme Kamer Hâtun’un vech-i meşrûh üzre evlâdına ve evlâdından sonra evlâd-ı evlâdına neslen ba‘de neslin vakfıdır sıhhat-i vakfa ve lüzûm-ı vakfa hükm-i hâkim lâhık olup huzûrumuzda tescîl-i şer‘î olmuşdur deyû mazmûn-ı vakfiyeye mutâbık edâ-i şehâdet-i şer‘iyye eylediklerinde bey‘-i mezbûrun butlânını ve menzil-i merkūmun vakfiyyetine hükm olundukdan sonra müşârün-ileyhâ talebleriyle mezbûr Mahmud Bey’den kendi hissesîçin kaziyyesin i‘tirâf eylediği iki yüz bin akçenin edâsıyla ilzâm olunduğu bi’t-taleb kayd-ı sicil olundu. Tahrîren fî evâsıtı Rebî‘ilevvel min şühûri semân ve tis‘în ve tis‘a mi’e. Şuhûdü’l-hâl: Fahrü’l-akrân Sefer Kethüdâ b. Abdülmennân, Hüseyin Çelebi b. Mustafa b. Abdullah et-Tımışvarî, Mustafa b. Abdülkerim, el-Hâc Osman b. Abdullah ve gayruhüm mine’l-hâzırîn.