Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 97 Hüküm no: 100 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. el-Hâc Mehmed’in, ölen kocası el-Hâc Mehmed’in evini, vârislerden satın aldığı Mahmiye-i Galata’da Câmi‘-i Kebîr mahallesinde harîkan fevt olan el-Hâc Mehmed’in veresesinden oğlu oğlu Hüseyin b. Mehmed b. el-Hâc Mehmed meclis-i şer‘-i şerîfe cedde Rukiye Hâtun bt. Hüseyin ve ammesi Fâtıma bt. el-Hâc Mehmed’in da‘vâ-yı âti’z-zikre vekîli olan zevci Mustafa Bey b. Abdullah ile râfi‘ü’l-kitâb İbrahim Bey b. Abdullah nâm cerrâh-ı sultânîyi ihzâr ve takrîr-i da‘vâ eylediklerinde mezbûr Hüseyin ceddim ve mûrisim merhûm el-Hâc Mehmed’in akārından mezbûrun sâkin olduğu menzil ma‘lûmü’l-hudûd ben sagīre iken bey‘ olunmadan ben iştirâ ettim deyû tasarruf eder suâl olunmasın taleb ederim deyicek gıbbe’s-suâl ben menzil-i mezbûru mezbûrun vasîsinden ve mezbûrân vârislerden ve sâbık vereseden elli bin akçe [ye] iştirâ ettim deyû cevâb vericek mezbûrân Rukiye ve Mustafa mukaddemâ bey‘ etmedik dediklerinden sonra mezbûrun zevcesi olup müteveffânın kızı olan müteveffât Meryem’e bey‘ ettik mezbûreye bey‘ etmedik hücceti kendi ismine ihrâc etmiş deyû zevce-i müteveffâyı Meryem bt. el-Hâc Mehmed’e bey‘ ettiklerine i‘tirâf ettiklerinde kaziyye cerrâh-ı mezbûr talebiyle kayd-ı sicil olundu. Tahrîren fî evâili Receb li sene semân ve tis‘în ve tis‘a mi’e. Şuhûdü’l-hâl: Mahmud b. İslâm el-Müezzin, Memi b. Ferhad, Receb b. Abdullah, Yusuf b. Mehmed, Mustafa b. Abdülkerim, İsa b. Abdurrahman, Derviş b. Abdi ve gayruhüm.