Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 102 Hüküm no: 105 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zabitü’l-avâbık Hasan b. Abdullah’ın, Peymâne Hâtun bt. Mahmud’un kaçak cariyesi Yasemin’i müddet-i örfiyesi dolmadan sattığı Mahmiye-i İstanbul’da Hoca Üveys mahallesi sâkinelerinden fahrü’l-muhadderât Peymâne Hâtun bt. Mahmud tarafından hasm-ı şer‘î mahzarında vekâleti sâbite olan işbu bâ‘isü’s-sicil el-Hâc Cafer b. Abdülmennân Kasımpaşa’da zâbitü’l-avâbık olan Hasan b. Abdullah nâm kimesneyi ihzâr ve mahzarında takrîr-i kelâm edip mezbûr Hasan müvekkilemin Yasemin nâm câriye-i âbıkasın tutup haps edip müddet-i örfiyyesi tamâm olmadan on dört bin akçeye bey‘ etmişdir tamâm olmadan bey‘ olunması şer‘î olmayıp aynı ile câriyeyi buldurup yâhud kıymet-i mislini tazmîne kādir olur deyû yedimde fetvâ-yı şerîfem vardır taleb ederim tefahhus olunup müddet-i örfiyyesi münkaziye olmadan bey‘ ettiği zâhir olur zâhir oldukda mûceb-i şer‘îsi icrâ olunsun dedikde gıbbe’s-suâl emr-i mezbûr takrîr-i kelâm edip fi’l-hakīka on dört bin akçeye Yasemin nâm bir câriye bey‘ ettirdim lâkin müddet-i örfiyyesi tamâm oldukdan sonra bey‘ etmişdir deyû cevâb verip ve yedinde Kasımpaşa nâibinden bir temessükü olup ibrâz eyledikde müdde‘î-i mezbûr temessük-i merkūm muvâza‘adır hakīkat-i hâl müslümanlardan ve zindancı olup bunun emsâlinde emîn ve mu‘temedün aleyh olandan bi’l-muvâcehe suâl olunsun Dîvân-ı hümâyûn’da tefahhus olunması fermân olunmuşdur deyû ilhâh ettikde emîn-i mezbûr tefahhus olunmağa mutâva‘at etmeyip meclis-i şer‘den firâr eyledikde mahmiye-i Galata zindancısı olan Hasan b. Abdullah hâzır olup tefahhus olundukda hakīkat-i hâl budur ki emîn-i mezbûr câriye-i merkūmeyi bir tarîkle ahz ve haps edip müddet-i örfiyyesi tamâm olmadan bey‘ etmişdir bi’l-muvâcehe dahi ihbâr ederim deyû haber vericek mâ vaka‘a bi’t-taleb kayd-ı sicil olundu. Tahrîren fî evâili Recebi’l-mürecceb li sene semânîn ve tis‘în ve tis‘a mi’e. Şuhûdü’l-hâl: Mustafa b. Abdülkerim, Receb Çelebi b. Mehmed, İbrahim Bey b. Mehmed, Mehmed b. Musa, Hüsrev b. Abdullah ve gayruhüm.