Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 108 Hüküm no: 117 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud Bey b. Abdülmennân’ın terekesinin eşi, oğulları ve kızı arasında paylaşıldığı Kasaba-i Beşiktaş sâkinlerinden olup mir-livâ-i Akkirman iken fevt olan merhûm ve mağfûrun-leh Mahmud Bey b. Abdülmennân fevt oldukda zevcesi Hümâ Hâtun bt. Ahmed’i ve iki sulbî oğulları Ali Çavuş ve Ramazan Bey’i ve Âişe nâm kızını terk eyledikde muhallefâtı beyne’l-verese kemâ yenbağī tevzî‘ ve taksîm olunmağın mesfûre Âişe fevt olup zevci Şaban Bey b. Abdullah’la mezbûrûn verese beyninde küllî nizâ‘ ve hısâm cârî oldukdan sonra mefharü’l-akrân mezbûrân Ali Çavuş ve Ramazan Bey ve vâlidelerin tarafından Murad b. Abdullah ve Sünbül Ağa b. Abdullah şehâdetleriyle hasm-ı şer‘î-i câhid mahzarında husûs-ı âti’z-zikre müte‘allik olan da‘vâ ve sulh ve ibrâda vekâleti sâbite olan fahrü’l-a‘yân Veli Çavuş b. ( ) ile ve mezbûr Şaban Reis’in husûsu mezbûrda vâki‘ olan cemî‘ da‘vâsına ve lâzım gelirse sulh ve ibrâya alâ ru’ûsi’l-işhâd meclis-i şer‘-i şâmihü’l-imâdda tevkîl etmesiyle vekâleti sâbite olan kıdvetü’l-kuzât Mehmed Çelebi b. Mahmud ile mahfil-i dîn-i metîn-i râsihü’l-evtâdda hâzırûn [30a] olduklarında mezbûr Mehmed Çelebi takrîr-i kelâm ve bast-ı merâm edip bundan akdem mezbûr Şaban Reis’in taht-ı nikâhında iken fevt olan zevcesi Âişe Hâtun’un vâlidi mîrâsından ve kendinin cihâz ve esbâbından ve mezbûr Şaban Reis mezbûre ile cem‘ olmadan müteveffât olmağın mezbûrenin vâlidesine ve birâderlerine verdiği emti‘a ve esbâbdır mezbûrûn Ali Çavuş ve Ramazan Bey ve Hümâ Hâtun’da hukūk-ı şer‘iyyesi olup onların dahi mezbûr ile nikâh husûsunda ve ba‘zı umûrda da‘vâları olup tarafeynden da‘vâ ve taleb olup küllî nizâ‘ ve cidâl sebk edip nice def‘a muhâsamât-ı şedîde ve münâza‘ât-ı adîdeleri geçmiş idi bi’l-âhare müslimûn-ı muslihûn mutavassitûn olmağın mezbûr Şaban Bey rızâsıyla mezbûr ile sulh olup mezbûr Şaban Reis kayınatası Mahmud Bey’den zevcesi Âişe Hâtun’a âid olan mîrâs husûsunda ve zevcesinin mâl-ı mahzından ve hayâtında kendiye âid olan nısf hisse-i şer‘iyyesi husûsunda da‘vâdan ve tevâbi‘ine irsâl ettim deyû da‘vâ ettiği esbâb ve emti‘a ve akmişeden ve bi’l-cümle husûs-ı mezbûra müte‘allik cemî‘ da‘vâ ve talebden iki yüz yirmi beş bin akçeye sulh eyleyip elli bin akçe nikâhdan zimmetinde bâkī olan mahsûb olup ve seksen bin akçe dahi ale’l-hesâb meclis-i sâbıkda kendi yediyle makbûz olup kendi meclis-i şer‘de sulh ve kabzına i‘tirâf eyleyip doksan beş bin akçe bâkī kalmışdı onu dahi hâlen mezbûrân Ali Çavuş ve Ramazan Bey ve vekîl-i mezbûr Veli Bey yedlerinden alıp kabûl ve kabz eyledim min ba‘d mezbûrûn ile müvekkilim merkūm Şaban Reis’in da‘vâsı ve nizâ‘ı kalmayıp bedel-i sulh-ı merkūm iki yüz yirmi beş bin akçe bî-kusûr vâsıl olmuşdur husûs-ı mezbûra müte‘allik da‘vâ sâdıra olursa lede’l-hükkâmi’l-kirâm mesmû‘a olmaya deyû i‘tirâf-ı tav‘î kıldıkda fi’l-hakīka meclis-i ma‘kūd’da vekîl-i mezbûr ile asîl-i merkūm Şaban Bey cem‘an hâzır olup sulh ve ibrâya ikrâr eyleyip meblağ-ı mezbûrun seksen bin akçesin hesaplaşıp bâkī kalan doksan beş bin akçenin kabz ve îsâline vekîl-i müşârün-ileyhi mükerreren tevkîl etmiş olmağın vekîl-i mezbûru mezbûrân Ali Çavuş ve Ramazan Bey asâleten ve mezbûr Veli Çavuş vekâleten tasdîk edip bizim dahi min ba‘d merkūm Şaban Bey ile mîrâs husûsuna müte‘allik ve nikâha müte‘allik da‘vâ ve talebimiz yoktur kıbelimizden da‘vâ sâdıra olursa lede’l-vülâtü’l-kuzât istimâ‘ ve iltifât olunmasın dediklerinde tarafeynin ikrâr ve tasdîki bi’t-taleb kayd-ı sicil olunup vesîka-i şâriha yed-i tâlibe def‘ olundu ki lede’l-ihtiyâc ihticâc edineler. Tahrîren fî evâili Şa‘bâni’l-mu‘azzam li sene semâne ve tis‘în ve tis‘a mi’e. Şuhûdü’l-hâl: Mevlânâ Halil b. Pîrî el-İmâm, Mustafa b. Hasan, Ali b. Mustafa, Mahmud b. Veli ve Ömer b. Hasan el-İmâm, Ömer b. Ahmed, Mustafa b. Abdülkerim, Mustafa Çavuş b. Abdullah el-Mübâşir, Mehmed Çavuş b. Sinan, Hidâyet b. Abdullah, Musa b. Sâlih, Keyvan Bey b. Abdullah, Süleyman b. Mehmed, Sâlih b. İsmail, Halil b. Ali, Mustafa b. Hasan, fahrü’l-a‘yân Cafer Bey b. Abdülmennân el-Mütevellî bi Bolayır, Ömer b. Abdullah Kâtib-i Bolayır ve gayruhüm mine’l-hâzırîn.