Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 107 Hüküm no: 116 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud Bey’in, karısı Hümâ bt. Ahmed ile oğulları Ali Çavuş ve Ramazan Bey arasındaki miras davası Kasaba-i Beşiktaş sâkinlerinden olup Akkirman sancağıbeyi iken vefât eden merhûm Mahmud Bey’in zevce-i metrûkesi ve vârisesi Hümâ bt. Ahmed tarafından husûs-ı âti’z-zikre vekîli olup bimâ hüve nehcü’s-sübût şer‘an vekâleti sâbite olan Veli Çavuş b. ( ) merhûm-ı merkūm kulun sulbî oğulları Ali Çavuş ve Ramazan Bey mahzarlarında takrîr-i kelâm edip işbu râfi‘ayi’l-kitâb mezbûrân Ali Çavuş ve Ramazan Bey’in babaları merhûm Mahmud Bey timarları mahsûlün kabz edip da‘vâ eylediklerinde yedi yüz elli bin akçenin üzerinde kaldığın isbât edip yedlerinde olan hüccet-i şer‘iyye mûcebince cümle maldan verilmek lâzım gelecek rızâ ve ittifâkımız ile meblağ-ı mezbûre tuta merkūmun terekesinden Beşiktaş’da vâki‘ hâlen sâkin olup tasarruf ettikleri menzil-i ma‘lûmü’l-hudûdu beş yüz bin akçeye ve altı bâb ma‘lûmü’l-hudûd dükkânları elli bin akçe ve İstinye nâhiyesinde vâki‘ olup merhûm-ı merkūma intimâ ile ma‘lûmü’l-hudûd olan çiftliği içinde kul ve karavaşları ile ve su sığırlarıyla ve cemî‘ tevâbi‘ ve levâhıkıyla yüz bin akçeye ve nakid dahi yüz bin akçeye verip deyn-i mezbûru bu minvâl üzre edâ etmişizdir müvekkilemin zikr olunan akār ve akçeye müte‘allik oğullarıyla da‘vâ ve nizâ‘ı yoktur deyû i‘tirâf eyledikde gıbbe’t-tasdîk kaziyye bi’t-taleb kayd-ı sicil olundu. Tahrîren fî gurreti Şa‘bâni’l-mu‘azzam li sene semâne ve tis‘în ve tis‘a mi’e. Şuhûdü’l-hâl: Mustafa b. Ali, Mustafa b. Abdülkerim, Mehmed b. Mustafa, Hidâyet b. Abdullah, Mustafa b. Hasan, Ali b. Abdullah, Murad b. Abdullah ve gayruhüm mine’l-hâzırîn.