Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 118 Hüküm no: 133 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Reis b. Ali’nin yetimlerine vasî tayin edilen Kamer Hâtun bt. Abdullah’ın eski vasî zimmetindeki yetimlerin paralarını tahsil ettiği Oldur ki Mahmiye-i Galata’da Câmi‘-i Kebîr mahallesi sâkinelerinden olup hâlen müteveffâ Ahmed Reis b. Ali nâm kimesnenin eytâmından Mustafa ve Kerime nâm sagīrlere kıbel-i şer‘den vasiyye nasb olunan Kamer Hâtun bt. Abdullah meclis-i şer‘-i şerîfe işbu bâ‘isü’l-kitâb bundan akdem müteveffâ-yı merkūmun muhallefâtından vasî olduğum mezbûrân Mustafa ve Kerime nâm yetîmlere irs-i şer‘le intikāl eden hisseleri ki merkūm Mustafa’nın otuz dokuz bin otuz iki akçeyi alıp ve mesfûre Kerime’nin on dokuz bin beş yüz on altı akçeyi cem‘an elli sekiz bin beş yüz kırk sekiz akçe merkūm Abdi Hoca yedinden vesâyetim hasebiyle alıp kabz ve kabûl eyledim min ba‘d zikr olunan akçeye müte‘allik da‘vâm ve nizâ‘ım yoktur deyû bi tav‘ihâ ikrâr ve i‘tirâf ettikden sonra merkūm Abdi Hoca tahkīk edip müteveffâ-yı merkūm Ahmed Reis’in muhallefâtından merkūm Mustafa ve Kerime nâm yetîmlere değen hisse-i şer‘iyyelerini vasiyyeleri olan Kamer Hâtun’a verip teslîm eyledim dedikde tarafeynin katında sâdır ve bâdir olan ikrâr ve tasdîk inde’ş-şer‘ mu‘tâd görülüp sıhhat-i ikrâra ve tasdîk hükm olunup bu vesîka-i enîka alâ mâ hüve’l-hakīka ketb ve imlâ olundu yed-i tâlibe vaz‘ ve def‘ olundu. Tahrîren fî gurreti şehri Ramazâni’l-mübarek sene 998. Şuhûdü’l-hâl: Rüstem Bey b. Abdullah el-Cündî, Halil b. Ali el-İmâm, İsmail b. Mehmed, Siyâmi b. Mustafa el-Müezzin ve gayruhüm.