Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 120 Hüküm no: 136 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis b. Abdullah’ın mal varlığını oğlu, kızı ve karısına hibe olarak paylaştırdığı Mahmiye-i İstanbul hâricinde Ayakapısı mahallâtından Gül Câmi‘i mahallesinden Mehmed Reis b. Abdullah meclis-i şer‘de işbu hâmilü’l-kitâb sulbî oğlu Mustafa ve kızı Sâliha ve zevcesi Âişe bt. Abdullah mahzarlarında bi’t-tav‘ ikrâr ve i‘tirâf edip hâlen silk-i mülkümde münselik ve taht-ı yedimde mutasarrıf olduğum mülk menzilimin nısfını ki hudûdunun bir tarafı Mi‘mâr Davud Ağa mülküne ve bir cânibi Reis oğlu menziline bir tarafı tarîk-i âma ve bir cânibi deryâya muttasıldır, hudûdu ve hukūku tevâbi‘ ve levâhıkıyla oğlum merkūm Mustafa’ya hibe ve temlîk eyledim deyip ve yine mahalle-i mezbûrede vâki‘ üç bâb dükkânımı ki beş hücreyi müştemil ve muhtevî olup hudûdlarının bir tarafı hisar duvarı ve bir cânibi tarîk-i âm ve iki tarafı Kara Kâfir ve Köse Kâfir menzilleri ile mahdûddur zikr olunan dükkânların nısfını ve bundan mâ‘adâ Keyvan nâm Megriliyyü’l-asl kulumu ve tecemmülât hânemden sünnet eylediğim zamânda verdiğim bir kadife yorgan ve bir kadife döşek ve bir kadife yastık ve iki münakkaş çarşafdan gayrı hâlen yine bir kadife yorgan ve üç beledî döşek ve sekiz aded Çerkezî suhûn verdim sini ve bir ibrik ve bir leğen ve bir büyük kaliçe ve bir küçük halı ve bir kırmızı velense ve bir mâî velense ve üç tâne tencere ve iki kazgan ve iki şamdan ve bir güğüm ve iki kilim bu zikr olunan emlâk ve esbâb ve nühâs ve evânî ferden ferdâ oğlum mezbûr Mustafa’ya hibe ve temlîk edip müslümanları işhâd eyledikden sonra yine ben mezbûr için velâyeten kabz ve zabt ve tasarruf eyledim deyip ve kızım mezbûre Sâliha yine zikr olunan menzilin rub‘ hissesiyle zikr olunan dükkânların rub‘ hissesini ve bundan mâ‘adâ Müyesser nâm ( ) asl câriyemi ve iki döşek ve iki yorgan ve sekiz aded tepsi ve bir leğence ve iki halı ve iki velense ve üç tencere ve bir kazgan ve bir büyük leğence ve iki şamdan ve bir güğüm mezbûre Sâliha’ya hibe ve temlîk edip ahâlî-i mahalleyi işhâd eyledikden sonra yine mezbûr için velâyeten kabz ve zabt ettim deyip ve zevcem mezbûre Âişe’ye zikr olunan menzilin rub‘ hissesiyle ve zikr olan dükkânların rub‘ hissesini hibe ve temlîk eyledim ol dahi kabz ve zabt eyledi dedikde mezbûre Âişe tasdîk ve kabz edip ve bundan gayrı etyab-ı mâlımdan beş bin dokuz yüz nakd-i râyic fi’l-vakt akçeyi ifrâz edip şart eyledim ki li emri’llâh ecelim yetişip fevt olduğumdan sonra meblağ-ı mezbûrdan dört bin akçe techîz ve tekfînime ve sâir levâzım-ı mühimmeme sarf olunup ve bin akçe dahi her gün iki akçeye bir sûre-i Yâsin-i şerîf tilâvet oluna akçe tükenince dört yüz akçe dahi iskāt-ı salât oluna ve beş yüz akçe dahi ol hînde …? kassâm olursa ona verile dedikde mukırr-ı mezbûr vech-i meşrûh üzre ikrârı ve hibesi mevhûbun lehümü’l-mezbûrûn için kabz ve teslîm ile şerâit-i hibe tamâm olup ebûd ve benûd mâni‘-i rücû‘ dahi olup “el-âyid fî hibetihî ke’l-âidi fî fietihî” hadîs-i şerîfi fehvâsınca rücû‘da kerâhatden dahi hâlî olmağın zikr olunan akār ve menkūlât mevhûbun lehümü’l-mezbûrûn Mustafa ve Sâliha ve Âişe’nin mülk-i mahzların ve hakk-ı sırfların olup bu vesîka-i enîka ber sebîl-i temessük ketb olunup yedlerine vaz‘ ve def‘ olundu ki vakt-i hâcetde temessük edineler. Hurrire fî evâili Ramazâni’l-mübârek li sene semânîn ve tis‘în ve tis‘a mi’e. Şuhûdü’l-hâl: Mustafa b. Abdullah, Halil b. Hızır, Ahmed b. Mustafa, Pervâne b. Abdullah, Mustafa b. Mehmed, Mustafa b. İlyas, Mustafa b. Murad el-Müezzin, İlyas Bey b. Abdullah, Piyâle Bey b. Abdullah.