Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 119 Hüküm no: 135 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Güher bt. Ali’nin, ölen Veli b. Ali’nin kız kardeşi olduğu ve mirasın Güher’e verilmesi Dâ‘î-i tahrîr-i kitâb nakli ve bâ‘is-i tastîr-i hitâb hükmü budur ki, Nefs-i Petric’de Câmi‘ mahallesinde Güher bt. Ali nâm hâtun husûs-ı âti’z-zikre da‘vâ-yı sahîha-i şer‘iyye ve istişhâd-ı sarîh-i mer‘î sâdırîn? oldukdan sonra udûl-i müslimînden ve sikāt-ı muvahhidînden Sefer Çelebi b. Ömer ve Mehmed b. Ferhad nâm kimesneler dahl ve tahvîl için mahall-i cerh ve ta‘dîlde el-masûn ani’t-ta‘dîl ve’t-tebdîl şöyle edâ-i şehâdet-i sahîha-i şer‘iyye ettiler ki tahkīk biz şâhidiz şehâdet dahi ederiz ki hâmile-i hâze’l-kitâb müdde‘iyye-i mezbûre bundan esbâk Petric sâkinlerinden olup İstanbul’a gidip Galata’ya tâbi‘ Kasımpaşa semtinde Tersâne-i âmire kurbunda tavattun edip vefât eden merhûm Veli b. Ali nâm kimesnenin li ebeveyn uhtudur mezbûr babaları Macar Ali demekle ma‘rûfdur Asitâne-i sa‘âdet kullarından Petric’de temekkün eden merhûm İskender Bey nâm kimesnenin mu‘takıdır Abdullah oğludur merhûm-ı mezbûr Veli’nin mahall-i mezkûrdan bint-i sagīre-i sulbiyesi vasîsi yedinde mazbûta olan muhallefâtının nısfı “ic‘âlû’l-ahavât ma‘a’l-benât” asabe mûcebince mezkûreye âid iken sagīre-i mezbûrenin dahi vefâtı haberi gelmeğin vâris-i mesfûre Güher’e münhasıradır bundan gayrı vâris bilmeziz dediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olucak hakīkatü’l-hâl hufye makāl taleb ve suâlden sonra sadr-ı serîr-i şerî‘at-i şer‘iyye ve mesned-i ilm u fazîlet-i mer‘iyyeye tasaddur ve cülûs eden hallâl-i müşkilât-ı dîniyye ve keşşâf-ı mu‘dilât-ı yakīniyye misbâh-ı zîver-i dekāyık miftâh-ı künûz-ı hakāyık el-âmilü’l-a‘mil el-fâsılı beyne’l-hak ve’l-bâtıl a‘ni bihi’l-hâkime’l-adl el-kâmil el-Kadı-i bi’l-asâkiri’l-mansûre bi vilâyet-i Rumeli el-ma‘mûre lâ-zâle bi eydi[hi]’ş-şerîf mücmi‘an li’n-nâsi ale’d-devâm bi hürmeti seyyidi’l-enâm aleyhi’s-selâm ve ashâbihi’l-kirâm ve ilâ küllî men yusallî ileyhi’l-kitâb mine’l-usûl ve’s-sevâb? me’mûlen mine himü’l-in‘âm bi’l-kabûl ve’l-amel bi’l-medlûl (…) mine’l-meliki’l-vehhâb. Cerâ zâlike fi’l-yevmi’s-sâmin aşer min şehri Şa‘bâni’l-mu‘azzam sene semâne ve tis‘în ve tis‘a mi’e. Şuhûdü’l-hâl: Ahmed Efendi el-Kadı bi’l-işfad?, Ali Efendi, Cârullah Efendi, Bekir Efendi el-Mülâzım ve gayruhüm. …? fakīr ilâ mahfili’l-hatîr Ahmed eş-şehîr bi ilmi’l-hakīr el-Kadı-i Petric.