Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 121 Hüküm no: 138 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hâtun bt. Hızır’ın, babasından intikal eden yarım ev hissesini kız kardeşi Sâliha bt. Hızır’a sattığı Bundan akdem mahmiye-i Galata dâhilinde merhûm ve mağfûr Sultan Bâyezid mahallesi sâkinelerinden fahrü’l-muvakkarât Sâliha Hâtun bt. Hızır tarafından bey‘-i âti’z-zikre ikrâra Yusuf b. Mehmed ve Hüsrev b. Abdullah şehâdetleriyle vekâleti sâbite olan Mehmed Bey b. Ali meclis-i şer‘-i şerîfde işbu hâmiletü’l-kitâb fahrü’l-muhadderât bâyi‘a-i mezbûrenin şakīkası Sâliha bt. Hızır cânibinden husûs-ı âti’z-zikri iştirâya Mehmed b. Abdullah ve Hızır b. Abdullah şehâdetleriyle vekâleti sâbite olan mezbûre Sâliha’nın zevci Mustafa Bey b. Mehmed mahzarında bi’t-tav‘ ve’l-ihtiyâr min gayri ikrâh ve icbâr i‘tirâf edip dedi ki müvekkilem mezbûre Sâliha’ya müteveffâ babası Hızır’dan intikāl eden edip altmış bin akçe kıymet ile mukavvem olan mülk menzil ki nısfı müvekkilem mezbûre Sâliha’ya ve nısfı dahi merkūm Sâliha’ya değip hâlen müvekkilem mezbûre Sâliha’ya değen nısf hisse menzili şakīkası merkūme Sâliha’ya otuz bin akçeye bey‘-i bât ile bey‘ eyleyip teslîm-i mebî‘ ve kabz-ı semen eyledi dedikde mûmâ-ileyh Mustafa Bey tasdîk edip müvekkilem ve zevcem mezbûre Sâliha şakīkası merkūme Sâliha’nın nısf hisse menzilini otuz bin akçeye iştirâ eyledi dedikde sıhhat-i bey‘a ve şirâya ve ikrârımı tasdîka hükm olunup yed-i tâlibeye vaz‘ ve def‘ olundu ki lede’l-hâce müzekkir-i mâ cerâ ola. Tahrîren fî evâhiri Ramazâni’l-mübârek li sene semâne ve tis‘în ve tis‘a mi’e. Şuhûdü’l-hâl: El-Hâc Mehmed b. Mehmed el-İmâm, Ali b. Mehmed el-Müezzin, el-Hâc Ahmed b. Mehmed, Cafer b. Abdullah, Hüsrev b. Abdullah, Sinan b. Mehmed, Mustafa el-Muhzır.