Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 122 Hüküm no: 139 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ahmed Reis’in kalan yetimlerinin nafakalarının temini Mahmiye-i Galata’da Câmi‘-i Kebîr mahallesi dâhilinde müteveffâ Ahmed Reis’in, Mustafa ve Kerime nâm yetîmlerine kıbel-i şer‘den vasiyye nasb olunan Kamer Hâtun bt. Abdullah ve müteveffâ-yı mezbûrun diğer yetîmi Mehmed’e cânib-i şer‘den vasiyye nasb olunan Mihri Hâtun bt. Abdullah meclis-i şer‘de hâzırân olup mezbûre Mihri Hâtun takrîr-i kelimât edip dedi ki kıbel-i şer‘den vasî olduğum yetîmlere nafaka ve kisve lâzım olup müteveffâ-yı mezbûrun Kürkçükapısı’nda vâki‘ olan dükkânın icâresini ben vasî olduğum yetîmin nafakası için kabz ve zabt edecek ve müteveffâ-yı mezbûrun yetîmleri için zabt ve kabz edip nafakalarına sarf edecek oldu bu vech üzre terâzi ve tesâdukumuz vâki‘ oldu dedikde mezbûre Kamer Hâtun vech-i meşrûh üzre olan terâzi ve tasdîk ve kabûl edip mâ hüve’l-vâki‘ ketb ve imlâ olunup yedlerine vaz‘ olundu. Şuhûdü’l-hâl: El-Hâc Nasuh b. Abdullah, Hüsrev b. Abdullah, Musli el-Muhzır, el-Hâc Ahmed el-Kayyım.