Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 122 Hüküm no: 140 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ahmed Reis b. Ali’nin ruhuna Yâsin-i şerîf tilâveti için para vakfettiği Sebeb-i tahrîr-i sicill-i şer‘î oldur ki Mahmiye-i Galata’da sâhibü’l-hayrât ve’l-hasenât müteveffâ Ahmed Reis b. Ali rûhu için Sûre-i Yâsin kırâat oluna deyû şart edip vakf eylediği meblağı teslîme mütevellî nasb eylediği işbu el-Hâc Nasuh b. Abdullah müteveffâ-yı merkūmun yetîmlerine kıbel-i şer‘den vasiyye nasb olunan Kamer Hâtun bt. Abdullah’ı meclis-i şer‘-i şerîfe ihzâr ve mahzarında takrîr-i da‘vâ kılıp müteveffâ-yı merkūm Ahmed Reis hâl-i hayâtında ve kemâl-i sıhhatinde etyab-ı malından ve ecyed-i menâlinden dört bin râyic akçe ifrâz edip vakf ve şart eyledi ki meblağ-ı merkūm onu on bir hesâbı üzre mu‘âmele-i şer‘iyye olunup ribhinden hâsıl olan meblağa ehl-i Kur’ân’dan bir kimesne mutasarrıf olup Câmi‘-i Kebîr’de salât-ı işâ‘dan sonra sûre-i Yâsin-i şerîf tilâvet edip sevâbını rûhuma hibe eyleye deyû şart edip hâlen meblağ-ı mezbûru müteveffâ-yı merkūmun muhallefâtından vasiyye-i mezbûreden taleb ederim dedikde gıbbe’s-suâl ve’l-inkâr ve’l-istişhâd udûlden Ahmed Reis eş-şehîr bi Karakaş ve Hacı Hüseyin b. Kılağuz şehâdet edip şehâdetleri ba‘de ri‘âyeti şerâiti’l-kabûl makbûle olup meblağ-ı mezbûr dört bin akçe müteveffâ-yı merkūmun muhallefâtından vasiyye-i merkūme yedinden hükm olunup mütevellî-i merkūm el-Hâc Nasuh kabz ve tesellüm ettikden sonra mezbûre Kamer Hâtun, İmâm-ı A‘zam Hazretleri katında vakf-ı nukūd bâtıl olmağın meblağ-ı mezbûru mütevellî-i merkūmdan taleb ederim dedikde mütevellî-i mezbûr İmâm Züfer’den Ensârî rivâyet ettiği üzre vakf-ı nukūd sahîhdir deyû imâm-ı mezbûr re’yi üzre vakfına hükm taleb ettikde hâkim-i nâfizü’l-ahkâm imâm-ı merkūm mezhebi üzre sıhhat-i vakfına hükm edip ve İmâm Züfer kavlinde vakf lâzım olmağın meblağ-ı merkūmu yine taleb ederim dedikde mütevellî-i merkūm imâmeyn re’yleri üzre mütevellîye teslîminden sonra vakf lâzım olur deyû cevâb vermeğin hâkim-i müterâfi‘u-ileyh imâmeyn-i hümâmeyn re’y-i sedîdleri üzre lüzûma dahi hükm edip meblağ-ı mezbûr vakf-ı sahîh ve lâzım olup hükmen sahîhan şer‘iyyen. Cerâ zâlike ve hurrire fî evâili şehri Ramazâni’l-mübârek sene 998. Şuhûdü’l-hâl: Musli el-Muhzır, Halil b. Ali, İsmail b. Mehmed, Hüsrev b. Abdullah, Mustafa el-Müezzin.