Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 125 Hüküm no: 145 Orijinal metin no: [36b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hasan b. Abdullah el-Münşârî’nin evinin yarısının, karısı Yasemin bt. Abdullah’a ait olduğu, diğer yarısının ise vârislere kaldığı Mahmiye-i Galata’da Abdülkerim b. Mustafa ve karındaşları Abdülkādir ve Ahmed nâm kimesneler câniblerinden da‘vâlarından ez-zikrü bimâ hüve nehcü’s-sübût ve kıbel-i şer‘îleri olan işbu bâ‘isü’l-kitâb mefhar-i emîrü’l-ümerâ’i’l-kirâm Hasan Bey b. Abdülhay nâm kimesne mahfil-i şer‘de merhûm Hasan b. Abdullah el-Münşârî nâm müteveffânın zevcesi Yasemin bt. Abdullah ve vekîl-i şer‘îsi olan Şem‘i b. Abdullah nâm kimesneleri ihzâr ve mahzarlarında takrîr-i kelâm ve ta‘bîr-i merâm edip müvekkillerimin cedd-i a‘lâlarının mu‘takının mu‘takı olan mezbûr Hasan el-Münşârî nâm müteveffânın hâric-i Galata’da vâki‘ Tophâne mahallâtından Tomtom mahallesinde olan menzilini velâyet tarîkiyle bi hasebi’ş-şer‘ menzil-i mezbûr hisse-i zevcden mâ‘adâsını bana intikāl eder deyû menzil-i mezbûru taleb eyledikde bi’l-vekâle ve’l-asâle Şem‘i b. Abdullah zikr olunan menzilin nısfı müteveffâ-yı mezbûrundur ve nısf-ı âharı müvekkiletem olan [37a] mezbûre Yasemin’in mülkü olup müteveffâ-yı mezbûr dahi nısfı kendinin ve nısf-ı âharı müvekkilemin mülkü olduğuna i‘tirâf etmişdir deyû da‘vâ ettiklerinde da‘vâlarına muvâfık beyyine [taleb] olundukda udûl-i müslimînden ve sikāt-ı muvahhidînden Seyyid Muhsin b. Seyyid Ataşim? ve Mahmud b. Mustafa el-Müezzin ve Hacı Ahmed b. Ali nâm kimesneler meclis-i şer‘de şehâdet edip merkūm Hasan el-Münşârî hâl-i hayâtında ve maraz-ı mevtinde mahalle-i mezbûrede sâkin olduğum menzilin nısfı zevcem olan Yasemin nâm hâtunumundur deyû kendi bizi işhâd etmeğin vech-i meşrûh üzre şâhidleriz lâkin ne vechile mülkü olduğuna vukūfumuz yoktur dediklerinde vech-i meşrûh üzre şehâdetleri bi’t-taleb ketb ve imlâ olunup yed-i tâlibe vaz‘ ve def‘ olundu ki lede’l-hâce müzekkir-i mâ cerâ ola. Tahrîren fî şehri Ramazâni’l-mübârek li sene semâne ve tis‘în ve tis‘a mi’e. Şuhûdü’l-hâl: Mustafa b. Abdülaziz el-İmâm, Nasuh b. Abdullah, Ali b. Abdullah, diğer Ali b. Abdullah, Hüsrev b. Abdullah, Hasan Ağa b. Abdullah, Ali Çelebi b. Mahmud ve gayruhüm.