Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 125 Hüküm no: 146 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Güher bt. Ali’nin, ölen kardeşi Veli ve kızı Âişe’den kendisine intikal eden hisseyi Veli’nin karısı Fâtıma bt. el-Hâc Mustafa’dan aldığı Kazâ-i Petric’de Câmi‘ mahallesinde olup kazâ-i mezbûr kadısı olan Mevlânâ Ahmed Efendi imzâsıyla ve mührü ile mümzâ ve memhûr nakl-i şer‘î îrâd eden Güher bt. Ali nâm hâtun mahmiye-i Galata’da mahalle-i Şehsuvar’da fevt olan mezbûre Güher’in karındaşı Veli’nin muhallefâtına vâzı‘atü’l-yed olan müteveffâ-yı merkūmun zevcesi Fâtıma bt. el-Hâc Mustafa tarafından vech-i âtî üzre da‘vâya ve sulh ve ibrâya bimâ hüve tarikü’s-sübût vekâleti şer‘an sâbite olan babası merkūm el-Hâc Mustafa mahzarında meclis-i şer‘-i şerîf-i şâmihü’l-beyân ve mahfil-i dîn-i münîf-i râsihü’l-erkânda merkūm Güher Hâtun takrîr-i da‘vâ ve tebyîn-i müdde‘â kılıp dedi ki karındaşım mezbûr Veli fevt olup hâlen verâseti mezbûre Fâtıma ile bana münhasıra olup bi hasebi’ş-şer‘i’ş-şerîf “ic‘âlû’l-ahavât ma‘a’l-benât” asabe mûcebince karındaşım merkūm Veli’den ve kızı Âişe’den bana âid olan hisse-i şer‘iyyemi taleb eylerim dedikde mezbûre Güher’den sıdk-ı da‘vâsına mutâbık beyyine taleb olundukda zeyl-i nakilde şuhûd-ı tarîk olan Mevlânâ Ahmed Efendi el-Kādî ve Ali Efendi ve Bekir Efendi ve Cârullah Bey nâm kimesneler şehâdet edip şehâdetleri ba‘de ri‘âyeti şerâiti’l-kabûl makbûle olup kabûl ve kabz edip meclis-i şer‘de bi’t-tav‘ ve’l-ihtiyâr min gayri ikrâh ve icbâr ikrâr ve i‘tirâf edip dedi ki müteveffâ-yı mezbûr karındaşım Veli’den ve kızı Âişe’den bana irs-i şer‘îyle intikāl eden hisse-i şer‘iyyem ve hakkım mukābelesinde meblağ-ı mezbûr yirmi bin akçeyi alıp kabûl ve kabz edip mezbûre Fâtıma’nın zimmetini ibrâ-i âmm-ı şer‘î ve kātı‘ ile ibrâ ve iskāt ettim min-ba‘d mezbûre Fâtıma’dan karındaşım merkūm Veli’nin ve kızı Âişe’nin muhallefâtına müte‘allik da‘vâ ve nizâ‘ edersem lede’l-hükkâm mesmû‘a ve makbûle olmayıp tezvîre ve telbîse mahmûle ola dedikde mukırra-i mezbûrenin ikrâr-ı meşrûhunda mukarrun lehâ’l-merkūm Fâtıma asâleten ve vekîli el-Hâc Mustafa vekâleten tasdîk ve tahkīk edip sıhhat-i ikrâra ve sulh ve ibrâya ve tasdîka hükm olunup bu vesîka-i enîka ber sebîl-i temessük ketb ve imlâ olunup yed-i tâlibe vaz‘ olundu ki lede’l-hâce müzekkir-i mâ cerâ ola. Tahrîren fî evâsıtı Ramazâni’l-mübârek li sene semânîn ve tis‘în ve tis‘a mi’e. Şuhûdü’l-hâl: Mustafa Halîfe el-Müezzin, el-Hâc Hasan b. Abdullah, Sefer Halîfe b. Ferhad, Hacı Mehmed b. Ali, el-Hâc Ahmed b. Abdullah, Mehmed b. Selâmsız, el-Hâc Murad b. Abdullah, Mehmed b. İlyas, Hüseyin b. Mehmed ve gayruhüm.