Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 130 Hüküm no: 154 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in yetimi Ahmed’e vasî olan el-Hâc Hasan b. Abdullah’ın, eski vasî el-Hâc Behram b. Abdullah zimmetindeki malları teslim aldığı Oldur ki Câmi‘-i Kasımpaşa mahallesinde müteveffâ Hasan Bey’in yetîmi Ahmed’e kıbel-i şer‘den vasî nasb olunan el-Hâc Hasan b. Abdullah meclis-i şer‘de işbu hâmilü’l-kitâb bundan akdem yetîm-i merkūmun mâlını hasbî kabz ve zabt eyleyen el-Hâc Behram b. Abdullah mahzarında bi tav‘ihî ikrâr eyleyip dedi ki yetîm-i merkūmun babasından irs-i şer‘îyle intikāl eyleyen malını ve müteveffâ-yı merkūm eczâ-i şerîfe için sülüs-i mâlından vakf eylediği akçe ki merkūm el-Hâc Behram hasbî kabz ve zabt eylemiş idi hâlen yetîm-i mezbûra ben vasî olup merkūm el-Hâc Behram’ın elinde olan muhallefât defteri mûcebince zimemden tahsîl eylediği nukūd ile cem‘an yüz kırk beş bin üç yüz seksen sekiz akçe alıp muhâsebesi görülüp elli beş bin beş yüz akçe ihrâcât zuhûr edip bâkī ba‘de külli’l-hesâb zimem-i nâsda doksan iki bin beş yüz akçe nakid ve bir Mushaf-ı şerîf müteveffânın ve diğer Mushaf-ı şerîf beş bin akçeye rehin olup ve Kasımpaşa’da bir ev yeri ve üç bin beş yüz akçe dahi yetîm-i merkūmun dâyesi Zibâ bt. Abdullah’dan intikāl edip zikr olunan meblağ yerli yerinden yoklanıp alıp kabûl edip iki Mushaf-ı şerîf alıp kabz edip min-ba‘d merkūm el-Hâc Behram Bey’in zimmetinde i‘tirâf edip zimem gösterdiği akçeden zimmetinde bir akçe ve bir habbe kalmadı alıp kabûl eyledim dedikde mukırr-ı merkūm el-Hâc Hasan’ın vech-i meşrûh üzre ikrârın mukarrun lehü’l-merkūm el-Hâc Behram Bey tasdîk ve kabûl edip sıhhat ve ikrâra [39a] ve tasdîka hükm olunup kayd şüd. Tahrîren fî şehri Ramazâni’l-mübârek li sene 998. Şuhûdü’l-hâl: Keyvan b. Abdullah el-Cündî, Kâtib Mahmud b. Cafer, Mehmed b. Hüseyin, İlyas b. Abdullah, el-Hâc Hasan b. Abdullah el-Kayyım, Mehmed Çelebi b. Aliyyüddin Fakīh el-İmâm ve gayruhüm mine’l-hâzırîn.