Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 130 Hüküm no: 155 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Abdullah’ın, evini karısı Sâliha Hâtun bt. İskender’e sattığı Mahmiye-i Galata tevâbi‘inden mahalle-i Câmi‘-i Kebîr sâkinlerinden vech-i âtî üzre bey‘ ve tescîle İbrahim b. Abdullah tarafından bimâ hüve tarîkü’s-sübût şer‘an vekâlet-i mutlakası sâbite olan eş-Şeyh Ahmed b. Mehmed meclis-i şer‘de merkūm İbrahim’in zevcesi Sâliha Hâtun bt. İskender tarafından iştirâya ve tasdîka bimâ hüve tarîkü’s-sübût şer‘an vekâleti sâbite olan merkūme Sâliha’nın babası mezbûr İskender mahzarında merkūm eş-Şeyh Ahmed bi’t-tav‘ ve’l-ihtiyâr i‘tirâf ve ikrâr edip müvekkilim merkūm İbrahim hâlen sâkin olduğu mülk menzilinin ki hudûdunun bir tarafı Kamer Hâtun mülküne ve bir cânibi merkūm İbrahim’in kızı Fâtıma mülküne ve bir tarafı tarîk-i hâssa ve bir tarafı hisar duvarına muttasıl ve mülâsık olup beyt-i süflî ve fevkānî ve gurfe ve sofa ve muhavvata ve bi’r-i mâ’ ve fırını müştemil ve muhtevîdir menzil-i mezbûr-ı mahdûdu Sâliha’ya târih-i kitâbdan iki ay mukaddem on beş bin akçeye bey‘ edip kabz-ı semen ve teslîm-i mebî‘ eyledi dedikde tarafeynden sâdır olan ikrâr ve îcâb ve kabûl ve tasdîk inde’ş-şer‘ makbûl olup sıhhat-i ikrâra ve tasdîka hükm olundu. Cerâ zâlike ve hurrire fî Şevvâli’l-mu‘azzam sene 998. Şuhûdü’l-hâl: Zünnûn b. Hüseyin, Mehmed b. Ali el-Hatîb, Derviş b. Abdullah, Abdülkādir b. Hacı el-Müezzin.