Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 133 Hüküm no: 161 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Pîr Mehmed’in, kızı Râbia bt. Hasan’a muvâzaa yoluyla sattığı evin parasını alamaması sebebiyle evi geri aldığı Oldur ki Kasımpaşa mahallâtından Memi Kethüdâ mahallesi sâkinelerinden Fâtıma bt. Pîr Mehmed nâm hâtun meclis-i şer‘-i şerîf-i şâmihü’l-bünyân ve mahfil-i dîn-i münîf-i râsihü’l-erkânda sulbiye kızı Râbia bt. Hasan tarafından vech-i âtî üzerine da‘vâya Ali b. Mustafa ve Hasan b. Ahmed şehâdetleriyle vekâleti sâbite olan mezbûre Râbia zevci Seyyid İlyas b. Musa mahzarında takrîr-i da‘vâ ve tebyîn-i müdde‘â kılıp mahalle-i mezbûrede vâki‘ bir tarafı tarîk-i âm ve bir cânibi Ali Reis b. Abdullah ve bir tarafı sîmkeş Abdi mülkü ve bir tarafı Fancandem(?) Reis mülkü ile mahdûd olan menzilimi merkūm Seyyid İlyas’ın müvekkilesi kızım mezbûre Râbia’ya muvâza‘a tarîkiyle ve ölünceye beni besleyip içinde bile sâkine olmak şartıyla sekiz bin akçeye bey‘ edip eline hüccet almış idi lâkin semen-i merkūmdan ben bir akçe ve bir habbe kabz eylemedim idi hâlen mezbûre Râbia beni red eyleyip satın aldım deyû kendi sâkine olur semenini kabz eylemeyip muvâza‘a tarîkiyle bey‘ olunmağla yine evimi taleb ederim dedikde gıbbe’s-suâl merkūm Seyyid İlyas cevâb verip mezbûre Fâtıma bu husûsuyla bundan akdem Kasımpaşa nâibi Mevlânâ Mehmed b. Yusuf huzûrunda da‘vâ edip ben bir akçe kabz eylemedim ikrârında kâzibe idim akçe kabz eylediğime şâhid getirsin dedikde müvekkilem mezbûre Râbia şâhide âciz oldukda mezbûre Fâtıma redd-i yemîn edip müvekkilem mezbûre Râbia yemîn eyleyip menzil-i merkūm yine müvekkileme hükm olundu deyû mevlânâ-yı merkūm ünvânı ile mu‘anven bir hüccet ibrâz edip fi’l-vâki‘ mazmûn-ı hüccetde mezbûre Râbia’ya yemîn verilip merkūme Fâtıma men‘ olundu deyû mastûr ve mübeyyen olup el-beyyinetü li’l-müdde‘î ve’l-yemîn alâ men enkere hadîs-i şerîfi mûcebince mezbûre Râbia’nın hüccetinin adem-i sıhhati vâzıh olup ve İmâm-ı A‘zam Hazretleri katında redd-i yemîn gayr-ı câiz olmağın mezbûre Râbia’nın vekîl-i merkūm Seyyid İlyas’dan mezbûre Râbia’ya teslîm-i semen eylediğine beyyine taleb olunup ityân-ı beyyineden âcize olup mezbûre Fâtıma’ya kabz-ı semen eylemediğine yemîn teklîf olunup yemîn billâh ettikden sonra zikr olunan menzil-i merkūm Fâtıma’ya hükm olunup mâ vaka‘a alâ vukū‘ihî kayd olundu. Tahrîren fî evâsıtı Zilka‘de sene 998. Şuhûdü’l-hâl: Ahmed b. Mehmed, Mustafa b. Ali er-Reis, Yusuf b. Musa, Mustafa b. Hasan, Murad b. Abdullah, Hasan b. Musa ve gayruhüm.