Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 134 Hüküm no: 163 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed b. Ferhad’ın, Receb b. Abdullah’taki alacağının beytülmal emini ve kâtibi tarafından tahsil edildiği Mahmiye-i Galata’da beytülmâl emîni olan fahrü’l-akrân Mehmed Bey b. Abdullah ve Hasan Bey b. Abdurrahman ve Ali Çelebi b. Mustafa nâm kimesneler meclis-i şer‘de işbu hâmilü’l-kitâb Receb b. Abdullah nâm kimesne mahzarında ikrâr ve i‘tirâf eyleyip bundan akdem vilâyet-i Rumeli’nde Narda sâkinlerinden olup mahmiye-i Kostantıniyye’de fevt olan Mehmed b. Ferhad eş-şehîr bi zâhir bâtın nâm müteveffânın on iki bin nakid akçe merkūm Receb zimmetinde zuhûr eyleyip meblağ-ı merkūm on bin akçe merkūm Receb’den bi’t-tamâm ve’l-kemâl alıp ve ahz u kabz eyledik dediklerinde merkūm Receb mukırrûn-ı merkūmûnun vech-i meşrûh üzre olan ikrârlarını vicâhen tasdîk ve tahkīk edip vâki‘ hâl gıbbe’t-taleb ve’s-suâl ketb olunup yed-i tâlibe vaz‘ olundu. Tahrîren fî evâili Zilka‘de sene 998. Şuhûdü’l-hâl: eş-Şuhûdü’s-sâbikūn.