Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 139 Hüküm no: 175 Orijinal metin no: [42a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim b. Abdullah’ın mallarını kızları Âişe ve Fâtıma’ya hibe ettiği Mahmiye-i Galata mahallâtından Câmi‘-i Kebîr mahallesi sâkinlerinden olup fevt olan hekîm İbrahim b. Abdullah’ın sulbiye kızı Âişe tarafından vekîl olup vekâleti bimâ hüve tarîkü’s-sübût şer‘an sâbite olan zevci el-Hâc Ahmed b. Mehmed ve müteveffâ-yı merkūmun zevcesi Sâliha bt. İskender meclis-i şer‘-i şerîfde işbu hâmilü’l-kitâb müteveffâ-yı mezbûrun diğer sulbiye kızı Fâtıma’ya vasiyy-i muhtâr olan Mehmed b. Mehmed mahzarında takrîr-i merâm eyleyip sagīr-i merkūm için zabt ve kabz eylediğin üç aded güğüm ve bir kazgan ve bir demir sini ve iki sahan ve bir bakraç ve bir küçük tas ve bir tencere ve bir demir kepçe ve bir nihâlî keçe müteveffâ-yı mesfûrun muhallefâtından bi hasebi’ş-şer‘i’ş-şerîf Kamer’e ta‘alluk edip taleb eyleriz dedikde gıbbe’s-suâl vasiyy-i merkūm cevâb verip müteveffâ-yı merkūm İbrahim zikr olunan esbâbı yetîme-i merkūmeye müzdâden hibe ve temlîk edip ben dahi yetîme-i merkūme için kabz ve zabt eyledim deyicek gıbbe’l-inkâr ve’l-istişhâd udûl-i müslimînden el-Hâc Ali el-Attâr ve Hacı İbrahim b. Abdullah [42b] nâm kimesneler şehâdet edip bizim huzûrumuzda zikr olunan esbâb-ı mezbûreyi hibe ve temlîk edip vasiyy-i merkūm Mehmed yetîme-i mezbûre için kabz ve zabt eyledi dediklerinde şehâdetleri ba‘de vekâleti şerâiti’l-kabûl makbûle olup bu vesîka-i enîka ber sebîl-i temessük ketb ve tahrîr olunup yed-i tâlibe vaz‘ olundu. Tahrîren fî Zilka‘de sene 998. Şuhûdü’l-hâl: Baba Zünnûn b. Hüseyin, Abdülkādir b. Hacı, Yusuf b. Abdullah, Mehmed b. Ali.