Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 139 Hüküm no: 176 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed b. Ferhad’ın vasîsi Mehmed Çavuş b. Hasan’ın, beytülmal emini ve kâtibi zimmetindeki paraları vesayeti sebebiyle teslim aldığı Bundan akdem vilâyet-i Rumeli’nden Narda sâkinlerinden olup mahmiye-i Kostantıniyye’de fevt olan Mehmed b. Ferhad eş-şehîr bi zâhir bâtın nâm müteveffânın vasiyy-i muhtârı olup vesâyetin bimâ hüve tarîkü’s-sübût şer‘an sâbite olan fahrü’l-cüyûş Mehmed Çavuş b. Hasan meclis-i şer‘de işbu hâmilü’l-kitâb mahmiye-i Galata’da beytülmâl emîni olan Mehmed Bey b. Abdullah ve Hasan Bey b. Abdullah ve kâtibi Ali Çelebi b. Mustafa nâm kimesneler mahzarlarından merkūm Mehmed Çavuş ikrâr ve i‘tirâf eyleyip müteveffâ-yı mesfûrdan gemici tâifesinden Kâtib Receb b. Şükrullah nâm kimesne zimmetinde yirmi bin akçe ve diğer Receb b. Abdullah nâm kimesne zimmetinde dahi on iki bin akçe cem‘an otuz iki bin akçe olup vâzı‘ü’l-yed olan merkūmûn Mehmed Bey ve Hasan Bey ve kâtibi Ali Çelebi yedlerinde meblağ-ı merkūmu bi’t-tamâm ve’l-kemâl vesâyetim hasebiyle alıp kabz ve ahz eyledim eğer min-ba‘d dahi meblağ-ı merkūma müte‘allik mezbûrdan öyle da‘vâ ve nizâ‘ sâdır olursa inde’l-hükkâmi’l-kirâm mesmû‘a ve makbûle olmaya dedikde mukırr-ı merkūm Mehmed Çavuş’un vech-i meşrûh üzre olan ikrârını mukarrun lehümü’l-mezbûrûn vicâhen tasdîk ve şifâhen tahkīk eyleyip mâ vaka‘a kayd şüd. Tahrîren fî evâsıtı Zilka‘de min şühûri sene 998. Şuhûdü’l-hâl: Hüsrev b. Abdullah, Mehmed b. Mustafa, Mustafa b. Ali, Ali b. Murad.