Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 142 Hüküm no: 182 Orijinal metin no: [43b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın Boğdan asıllı cariyesini azat ettiği Abdülkādir b. Mehmed el-İmâm ve Mehmed Çelebi b. Abdülkādir el-İmâm ve Mehmed b. Abdurrahman el-Hâfız ve Mehmed Çelebi b. Muhyiddin Halîfe nâm kimesneler meclis-i şer‘a hâzırûn olup, mahmiye-i Hazret-i Ebî Eyyûb-i Ensârî’de vâki‘ Beytülmâl-i âm ve hâssın emîni Mehmed Bey b. Sinan ve kâtibi Şehsuvar Bey b. Mehmed mahzarlarında ve ayrıca mahmiye-i mezbûre mahallâtından ( ) mahallesinde bundan akdem fevt olan Sâliha bt. Abdullah nâm zevcesinin vasiyyetlerinin tenfîzine vasiyy-i muhtâr olan Kurd Mehmed Bey b. Hüsrev nâm kimesne mahzarında, Boğdaniyyetü’l-asl, orta boylu, açık kaşlı, elâ gözlü hâmiletü hâze’l-kitâb Âfitâb bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, mahmiye-i mezbûre mahallâtından mahalle-i merkūmede fevt olan mezbûre efendisi Sâliha bt. Abdullah, maraz-ı mevtimden üç sene mukaddem hürsün diyerek tedbîr-i mukayyed ile müdde‘iyye-i mezkûreyi tedbîr eyledi. Lâkin müddet-i mezkûreden fazla yaşadı ve sıhhat buldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber olmağın mûcebince mezheb-i muhtâra tevfîkan mezbûrenin ıtkına hükm edildi. Câriye-i mezbûre bu sûretle sâir harâir-i asliyyât-ı mükellefât gibi hürre oldu. Efendilerin âzâdlı köleleri üzerinde şer‘an sâhib oldukları velâ hakkından gayrı üzerinde kimesnenin bir hakkı kalmadı. Cerâ zâlike ve hurrire fî evâhiri Zilka‘de sene 998. Şuhûdü’l-hâl: El-Mezbûrîn bi zeyli sûreti’l-ûlâ.