Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 173 Hüküm no: 236 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim b. Abdullah’ın malının üçte birini hayır işleri için vasiyet ettiği Mahmiye-i Galata sâkinlerinden Mehmed b. Alâaddin el-Hatîb ve Ahmed Halîfe b. eş-Şeyh Mehmed sâir müslümanlar ve Derviş Çelebi b. Ali el-Müezzin ve Mehmed b. Derviş el-Müezzin ve Câmi‘-i Kebîr huddâmından mahmiye-i mezbûre mahallesinde fevt olan hekîm İbrahim b. Abdullah’ın vasiyy-i muhtârı olan Mehmed b. Mehmed nâm kimesne mahzarında takrîr-i kelâm edip dediler ki müteveffâ-yı mezbûr İbrahim Bey hâl-i hayâtında malının sülüsünü techîz ve tekfîne ve ulemâ ve fukarâya ve vücûh-i hayrâta vasiyyet ve şart eyleyip merkūm Mehmed müteveffâ-yı mezbûrun sülüsünün bir mikdârın harc edip ve bir mikdârı bâkī kalmışdır ulemâ ve fukarâdan olmağile taleb eyleriz dediklerinde vasiyy-i merkūm Mehmed’e suâl olundukda cevâb verip müteveffâ-yı mezbûr İbrahim’in muhallefâtı sûk-ı sultânîde bey‘ olunup sekiz bin dört yüz yetmiş dokuz akçe sülüsü zuhûr edip techîz ve tekfîne ve mezârına ve üstünde kırâat eden ulemâ ve fukarâya ve yedisine ve kırkına harc edip elimde olan defter mûcebince bende dört yüz doksan akçe bâkī kalmış idi deyû mezbûrlara meclis-i şer‘de teslîm edip ve sekiz yüz akçe dahi yılında ta‘âm harc için bâkī kalmışdır zikr olunan meblağdan mâ‘adâ benim zimmetimde bir akçe ve bir habbe kalmamışdır müteveffâ-yı mezbûrun vasiyyet mûcebince sarf eyledim dedikde zikr olunan sülüsden vasiyy-i merkūm Mehmed kendi ekl ve bel‘ ve ketm eylemediğine mezbûrların talebleriyle kıbel-i şer‘de yemîn müteveccih, merkūm Mehmed yemîn billâh eyleyicek berât-ı zimmetine hükm olunup bu vesîka-i enîka ketb ve imlâ olunup yed-i tâlibe vaz‘ ve def‘ olundu ki lede’l-hâce müzekkir-i mâ cerâ ola. Tahrîren fî evâsıtı Zilhicce sene 998. Şuhûdü’l-hâl: Hüsrev b. Abdullah, Abdülkādir b. Hacı, Mehmed b. Mustafa, Mehmed b. Ali, Ali b. Mustafa.