Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 187 Hüküm no: 266 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hâtun bt. Abdullah’ın, ölen kocası Samet Reis b. Üveys’in kardeşi Şükür Reis’e açtığı alacak davasından vazgeçtiği Himmet Reis b. Üveys nâm müteveffânın vâriselerinden zevcesi Kamer Hâtun bt. Abdullah mahfil-i kazâda müteveffâ-yı mezbûrun li eb ve üm karındaşı Şükür Reis mahzarında takrîr-i da‘vâ eyleyip müteveffâ-yı mezbûr[a] hâl-i hayâtında ve kemâl-i sıhhatinde karz-ı hasen altı bin akçe verdim idi meblağ-ı merkūmu hâlen muhallefâtından taleb eylerim dedikde gıbbe’s-suâl mezbûr Şükür Reis cevâb verip dedi ki müteveffâ-yı mezbûrda senin meblağ-ı merkūmdan bir akçe ve bir habbe hakkın yoktur lâkin müteveffâ-yı mezbûrun sende olan Gürciyyü’l-asl Mülâyim nâm câriye müteveffânın muhallefâtındandır taleb ederin dahi câriye-i merkūmeyi bey‘ olunup beyne’l-verese tevzî‘ ve taksîm olunmasın taleb eylerim dedikde gıbbe’s-suâl husûs-ı merkūma müte‘allik münâza‘ât-ı kesîre ve muhâsamât-ı şedîde vâki‘ olup mâbeynlerine muslihûn tavassut eyleyip es-sulhu seyyidü’l-ahkâm fehvâsıyla amel olunmuşdur zikr olunan altı bin akçe da‘vâsından merkūme Kamer Hâtun ferâgat eyleyip ve merkūme câriye talebiyle dahi merkūm Şükür Reis ferâgat eylemek üzre ibrâ-i âm ile ibrâ ve iskāt-ı tamâm ile iskāt olundukdan sonra ba‘de’l-yevm tarafeynden husûs-ı mezbûra müte‘allik asâleten ve vekâleten muhallefât-ı merkūmeye müte‘allik da‘vâ ve nizâ‘ sâdır olur ise inde’l-hükkâm mesmû‘a olmaya dediklerinde gıbbe’t-taleb ketb olunup yed-i tâlibe vaz‘ olundu. Saferü’l-muzaffer sene 999. Şuhûdü’l-hâl: Mehmed b. Mustafa, İsa b. Abdurrahman, Abdülkādir b. Hacı, Hüsrev b. Abdullah.