Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 198 Hüküm no: 287 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapıcı Hüseyin Bey b. Abdullah’ın, evini kızı Âişe’ye hibe ettiği Oldur ki Bundan akdem mahmiye-i Galata hâricinde merhûm Kasımpaşa mahallesinde fevt olan kapıcı Hüseyin Bey b. Abdullah’ın vârislerinden sulbiye kızı Âişe tarafından husûs-ı âti’z-zikri da‘vâ ve kabza vekîl olup vekâleti bimâ hüve tarîkü’s-sübût şer‘an sâbite olan işbu hâmilü’l-hurûf zevci fahrü’l-akrân Ali Bey b. Abdülmennân nâm kimesne meclis-i şer‘-i şerîfde müteveffâ-yı mezbûrun diğer sulbiye kızı Sâkine tarafından vekîl-i şer‘îsi olan Maksud b. Ahmed mahzarında takrîr-i kelâm ve tebyîn-i merâm kılıp dedi ki müteveffâ-yı mezbûrun mahalle-i mezbûrede vâki‘ bir tarafı Şuayb Çelebi b. İbrahim ve bir tarafı Mesih Bey b. Abdullah’ın mülkü ve bir tarafı Fâtıma bt. Abdullah ve bir tarafı tarîk-i hâssa müntehî olan iki bâb mülk menzili içinde bir bâb fevkānî ev önünde sofasıyla müvekkilem mezbûre Âişe’ye babası müteveffâ-yı mezbûr hâl-i hayâtında ve kemâl-i sıhhatinde hibe-i sahîha ile hibe ve temlîk edip ol dahi ba‘de’t-tahliyye kabz ve zabt ve tesellüm eylemiş idi el-hâletü hâzihî menzil-i mezbûru müvekkilem Âişe’nin tasarrufuna vekîl-i mezbûr Maksud mâni‘ olup şer‘le men‘ ve def‘ olunmasın taleb eylerim dedikde gıbbe’s-suâl ve’l-inkâr ve’l-istişhâd udûl-i müslimînden Mevlânâ Abdülkerim Halîfe b. Mehmed el-İmâm ve Mahmud b. Abdullah ve Mustafa b. Abdullah ve Ferruh b. Abdullah nâm kimesneler meclis-i şer‘a li ecli’ş-şehâde hâzırûn olup fi’l-hakīka müteveffâ-yı mezbûr hâl-i hayâtında menzil-i mezbûru kızı merkūmeye hibe ve temlîk edip ol dahi kabz ve tesellüm eyledi deyû müteveffâ-yı mezbûrun vech-i meşrûh üzre olan ikrâr ve i‘tirâfı şâhidleri şehâdet dahi eyleriz deyû edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ oldukdan sonra mâ hüve’l-vâki‘ alâ vukū‘ihî ketb olunup yedine def‘ olundu. Tahrîren fî evâsıtı Cumâdelûlâ sene 999. Şuhûdü’l-hâl: Mehmed Sofu b. İsmail, Turgut b. Ahmed, Hasan Bey b. Abdullah, Hüsrev b. Abdullah el-Muhzır ve Musli b. Ali ve gayruhüm.