Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 203 Hüküm no: 292 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyne Hâtun bt. Abdi’nin evini ölmeden Perviz b. Abdullah’a sattığı, Receb b. Abdi’ye miras bırakmadığı Bundan akdem Mahmiye-i Galata mahallâtından hâricinde Kasımpaşa mahallesinde fevt olan Eyne Hâtun bt. Abdi nâm müteveffâtın vârislerinden Receb b. Âbid nâm kimesne mahfil-i kazâda işbu hâmilü’l-kitâb Perviz b. Abdullah nâm kimesne mahzarında takrîr-i kelâm ve tebyîn-i merâm kılıp mahalle-i mezbûrede inde’l-ahâlî ma‘lûmetü’l-hudûd olup merkūm Perviz Bey’in yedinde olan menzil müteveffât-ı merkūme mülkü idi. Hâlâ bi hasebi’l-irs bana intikāl etmiş taleb eylerim, suâl olunsun dedikde gıbbe’s-suâl mezbûr Perviz Bey cevâb verip fi’l-vâki‘ menzil-i mezbûr, müteveffât-ı mezkûrenin mülkü idi. Lâkin müteveffât-ı mezbûre menzil-i mezbûru hâl-i hayâtında ve kemâl-i sıhhatinde târih-i kitâbdan bir yıl mukaddem bana on yedi bin nakd-i râyic fi’l-vakt akçeye bey‘-i bât ile bey‘ eyleyip teslîm-i semen ve kabz-ı mebî‘ eyledim. Elimde hüccet-i şer‘iyyem vardır deyû Kasımpaşa’da hilâfetine müvellâ olan Mevlânâ Mehmed b. Yusuf ünvânıyla mu‘anven ve hatmiyle mahtûm ve sene semânîn ve tis‘îne ve tis‘a mi’e Cumâdelûlâsı evâiliyle müverrah ve da‘vâ-yı meşrûhasını müştemil hüccet-i şer‘iyye ibrâz edip mezbûr Receb mazmûn-ı hücceti inkâr ettikde mazmûn-ı hüccete merkūm Perviz Bey’den beyyine taleb olundukda udûl-i müslimînden Abdülkerim Hoca b. Mehmed ve Hacı Nasuh b. İbrahim ve Receb b. İsmail ve Hasan b. Ali ve İlyas b. Ali ve Abdurrahman b. Seydi ve İlyas b. Abdullah nâm kimesneler meclis-i şer‘a hâzırûn olup fi’l-vâki‘ zikr olunan hüccet bizim huzûrumuzda oldu. Mazmûn-ı hüccete şâhidleriz ve şehâdet dahi eyleriz deyû vech-i meşrûh üzre edâ-i şehâdet eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ oldukdan sonra mâ hüve’l-vâki‘ alâ vukū‘ihî ketb [ve] imlâ olunup yed-i tâlibe def‘ olundu. Tahrîren fî evâili Cumâdelâhire sene 989. Şuhûdü’l-hâl: Şeyh Mehmed b. Abdi, Ömer Halîfe b. Mehmed, Derviş Halîfe b. Abdi, Perviz Bey b. Abdullah, Şaban b. Abdullah ve Hasan b. Abdullah, Musli b. Ali, Hüsrev b. Abdullah el-Muhzır, Bâli b. Ali, Ali b. Abdullah el-Muhzır ve gayruhüm.