Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 205 Hüküm no: 295 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyne Hâtun bt. Abdi’nin evini ölmeden Perviz b. Abdullah’a sattığı, Receb b. Abdi’ye miras bırakmadığı Mahmiye-i Galata hâricinde Kasımpaşa mahallesinde bundan akdem vefât eden Eyne Hâtun bt. Abdi nâm hâtunun vârislerinden olan Receb b. Âbid nâm kimesne işbu hâmil-i hâze’l-kitâb Perviz b. Abdülvehhâb nâm kimesne meclis-i şer‘-i şerîfe ihzâr ve mahzarında üzerine takrîr-i kelâm [ve] ta‘bîr-i merâm kılıp mahalle-i mezbûrede vâki‘ inde’l-ahâlî ve’l-cîrân ma‘lûmetü’l-hudûd olup merkūm Perviz Bey’in yedinde olan menzil mûrisem olan müteveffât-ı mezbûrenin mülkü idi. Hâlâ vefât edip menzil-i mezkûr bi hasebi’l-irsi’ş-şer‘î bana intikāl eyledi. Hakkımdır taleb ederin. Suâl olunsun dedikde gıbbe’s-suâl merkūm Perviz Bey cevâb verip fi’l-vâki‘ menzil-i mezbûr, müteveffât-ı mezkûrenin mülkü idi. Lâkin müteveffât-ı merkūme menzil-i mezbûru hâl-i hayâtında ve kemâl-i sıhhatinde târih-i kitâbdan bir yıl mukaddem bana on yedi bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip semen-i merkūmum sekiz bin akçesini merkūm Eyne Hâtun zimmetinde olan sekiz bin akçe hakkım ile mukāssa edip bâkī dokuz bin akçesini addedip müteveffât-ı mezbûreye bî-kusûr ve lâ-küsûr îfâ ve teslîm eyledim. Müteveffât-ı mezkûre dahi istîfâ ve kabz eyledi deyicek gıbbe’s-suâl ve’l-inkâr merkūm Perviz Bey’den da‘vâsına mutâbık beyyine taleb olundukda merkūm Kasımpaşa’da hilâfeten müvellâ olan Mehmed b. Yusuf ünvânıyla mu‘anven ve hatmiyle mahtûm ve sene semânîn ve tis‘îne ve tis‘a mi’e Cumâdelûlâsı evâiliyle müverrah ve da‘vâ-yı meşrûhasını müştemil hüccet-i şer‘iyye ibrâz edip mazmûn-ı hüccet-i mezbûr merkūm Receb’den suâl olundukda hüccet-i mezkûre müştemil olduğu akid bi tarîki’l-muvâza‘adır. Nakd-i semen olmamışdır deyicek merkūm Perviz Bey’den semen-i merkūmu bi’t-tamâm îfâ ve teslîm eylediğine beyyine taleb olundukda udûl-i müslimînden ve sikāt-ı muvahhidînden el-Hâc Nasuh b. İbrahim ve Abdurrahman b. Seydi ve Şaban b. Abdullah ve Ali b. Mustafa ve Veli b. Mustafa nâm kimesneler li ecli’ş-şehâde hâzırân olup fi’l-vâki‘ müteveffât-ı mezkûre hâl-i hayâtında ve kemâl-i sıhhatinde târih-i kitâbdan bir yıl mukaddem merkūm Perviz Bey’e on yedi bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip semen-i merkūmun sekiz bin akçesini merkūm Perviz Bey’in müteveffât-ı mezkûre zimmetinde mukarrer olan sekiz bin akçe hakkından mukāssa, bâkī dokuz bin akçesini merkūm Perviz Bey meclis-i akidde addedip müteveffât-ı merkūmeye teslîm eyledi. Müteveffât-ı mezkûre dahi bi’t-tamâm istîfâ ve kabz eyledi. Biz meclis-i akidde hâzır idik. Şâhidleriz, şehâdet dahi ederiz dediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâki‘ olup mâ hüve’l-vâki‘ ketb olunup yed-i tâlibine def‘ olundu. Tahrîren fî evâili Cemâziyelevvel sene 999. Şuhûdü’l-hâl: Şeyh Mehmed b. Abdi, Ömer Halîfe b. Mehmed, Derviş Halîfe b. Abdi, Perviz Bey b. Abdullah, Şaban b. Abdullah, Hasan b. Abdullah, Ömer Çelebi b. Mehmed, Musli b. Ali el-Muhzır, Ali b. Abdullah el-Muhzır ve gayruhüm mine’l-hâzırîn.