Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 206 Hüküm no: 296 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in, ölen Hüseyin b. Yakub’taki alacağını terekesinden istediği Mehmed b. Ahmed mahfil-i kazâda hâric-i Galata’da Çekmece’de fevt olan Hüseyin b. Yakub nâm kimesnenin zevcesi Râbia bt. Hamza ve oğlu Mehmed mahzarında takrîr-i kelâm edip dedi ki: Müteveffâ-yı mezbûr hâl-i hayâtında karz-ı şer‘îden dört bin akçe verdim hâlâ muhallefâtından taleb eylerim dedikde gıbbe’s-suâl ve’l-inkâr ve’l-istişhâd udûl-i müslimînden ve sikāt-ı muvahhidînden Mehmed b. Hüseyin ve Yusuf b. Hamza nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûre hâl-i hayâtında meblağ-ı mezbûru mezbûr Mehmed’e deynim vardır deyû ikrâr ve i‘tirâfına şâhidleriz, şehâdet dahi eyleriz deyû edâ-i şehâdet-i şer‘iyye eylediklerinden sonra mâ vaka‘a kayd ve tescîl olundu. Şuhûdü’l-hâl: Perviz Bey b. Abdullah, Abdülkādir Halîfe b. Hacı, Derviş b. Abdi ve gayruhüm.