Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 206 Hüküm no: 297 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hüseyin Çavuş b. Maksud’un terekesinden, hizmetkarı Veli b. Bayezid’e vasiyet üzere para verilmesi Veli b. Bayezid nâm kimesne mahfil-i kazâda bundan akdem mahmiye-i Galata hâricinde Beşiktaş mahallesinde fevt olan Arapkirli Hüseyin Çavuş b. Maksud nâm müteveffânın muhallefâtına vâzı‘ü’l-yed olan beytülmâl emîni olan Musa Çavuş b. Kaya mahzarında takrîr-i kelâm ve tebyîn-i merâm kılıp dedi ki: Müteveffâ-yı mezbûr bana dört bin akçe nakid bir dolama bahâsı vasiyyet eyledi dedikde gıbbe’l-inkâr mezbûr Veli’de[n] da‘vâsına mutâbık beyyine taleb olundukda udûl-i müslimînden fahrü’l-müderrisîn Mevlânâ Mehmed Efendi b. Hasan ve fahrü’l-mülâzımîn Ramazan Efendi b. Abdi nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûr hâl-i hayâtında hizmetkârı olan mezbûr Veli’ye dört bin akçe ve bin akçe dahi dolama bahâsı veresin deyû edâ-i şehâdet-i şer‘iyye eylediklerinden sonra mâ vaka‘a kayd-ı sicil olundu. Tahrîren fî evâili Cumâdelâhire li sene tis‘a ve tis‘îne ve tis‘a mi’e. Şuhûdü’l-hâl: Yahya Çelebi b. Mehmed, Ahmed b. Abdullah, Hasan b. Abdullah, Ali Çavuş b. Abdullah, Ali b. Bâli, Mezid b. Abdullah, Musli b. Ali el-Muhzır.