Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 208 Hüküm no: 301 Orijinal metin no: [72b- 3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras hissesinin satış yoluyla paylaşılması Mahmiye-i Galata mahallâtından Muhyiddin Çelebi mahallesinde sâkine olan Emine bt. Veys nâm kimesne kendi cânibinden asâleten ve sagīr oğlu Ali b. Mustafa tarafından vesâyeten mahfil-i kazâda Emine ve Rahime nâm hâtunlar tarafından Mahmud b. Şehsuvar ve Hüseyin b. Ali nâm kimesneler[in] şehâdetleriyle vekâletleri sâbite olan işbu hâmilü’l-kitâb Yusuf b. Abdülvehhâb nâm kimesne mahzarında ikrâr ve i‘tirâf edip bundan akdem sadrî oğlum Mehmed ve sadriye kızım Safiye vefât edip li eb karındaşı mezbûr Ali ve li eb karındaşları mezbûre Emine ve Rahime’yi terk edip [73a] muhallefâtından mahalle-i mezbûrda vâki‘ bir tarafı Muslihiddin mülküne ve bir tarafı Ömer Bölükbaşı mülküne ve iki tarafı tarîk-i âma müntehî olup dokuz bin akçe kıymetli menzilin terk eylemiş idi. Hâlâ zikr olunan menzil-i mezbûrdan benim südüs hissem ve sagīr-i merkūmun südüs hisse-i şer‘iyyesin zarûreten nafaka için merkūmeyn Rahime ve Emine’ye asâleten ve vesâyeten üç bin nakd-i râyic fi’l-vakt akçeye bey‘-i bâtt-ı sahîh ile bey‘ edip teslîm-i mebî‘ ve kabz-ı semen eyledim dedikde mezbûre Emine Hâtun’un vech-i meşrûh üzre olan ikrârın mezbûrân Emine ve Rahime’ye vicâhen tasdîk ve şifâhen tahkīk edip mâ vaka‘a kayd şüd. Tahrîren fî evâili şehri Cumâdelâhire sene 999. Şuhûdü’l-hâl: Ahmed Çavuş b. Sefer, Hızır b. Pîrî er-Râcil, Mehmed Çelebi b. Alâaddin, el-Hâc Hüseyin b. Ali el-Müezzin, Şaban b. Ser-bölük, Pervâne b. Abdullah, Muslihiddin b. Ali Ser-bölük ve gayruhüm.