Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 212 Hüküm no: 309 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle Bey b. Abdülmennân’ın, kölesi Çol v. Biyan ile hizmet karşılığı azat anlaşması yaptığı Sâhib-i sa‘âdet kapudân paşa cânibinden husûs-ı âtîye vekîl olup vekâleti Haydar b. Abdullah ve Ahmed b. Abdullah nâm kimesneler şehâdetleriyle sâbite olan fahrü’l-akrân Piyâle Bey b. Abdülmennân nâm kimesne meclis-i şer‘-i şerîfde işbu hâmilü’l-kitâb uzun boylu, çatık kaşlı, gök elâ gözlü, sarışın, başının sağ tarafında eser-i cerâhati olan Efrenciyyü’l-asl Çol v. Biyan nâm gulâm mahzarında bi’l-vekâle ikrâr ve i‘tirâf edip abd-i mezbûra târih-i kitâbdan altı yıl hizmet ta‘yîn edip bu kitâb-ı sıhhat nisâbı verdim. Müddet-i merkūmede ibâk ve sirkat ve hıyânet ederse kemâ kân rık ve (…) edip sedâd ve istikāmet üzre hizmet ederse sâir ahrâr-ı asliyyîn gibi hür olsun deyû ikrârını vekîl-i mezbûr Piyâle vech-i meşrûh üzre olan ikrârını gulâm-ı mezbûr tasdîk edip bi’t-taleb kayd şüd. Tahrîren fî evâili Cumâdelûlâ sene 999. Şuhûdü’l-hâl: Bayram Ağa b. Abdülmennân, el-Hâc Selim b. Mehmed, Hüseyin b. Hasan ez-Za‘îm, Hasan Ağa b. Abdullah ez-Za‘îm ve gayruhüm mine’l-hâzırîn.