Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 212 Hüküm no: 310 Orijinal metin no: [74a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın yetimi Pîrî’ye, annesi Sâkine bt. Abdullah’ın vasî tayini olmasıyla eski vasî el-Hâc Hasan b. Abdullah’taki muhallefâtı aldığı Bundan akdem mahmiye-i Galata hâricinde Kasımpaşa mahallesinde fevt olan Hasan b. Abdullah nâm müteveffânın sulbî [oğlu] Pîrî nâm sagīre kıbel-i şer‘den vasî olan vâlidesi Sâkine bt. Abdullah meclis-i şer‘de bundan akdem sagīr-i mezbûrun vasîsi olan el-Hâc Hasan b. Abdullah el-Câbi nâm kimesne mahzarında takrîr-i merâm edip sagīr-i mezbûr Ahmed’e babasından intikāl eden emvâlini merkūm el-Hâc Hasan vesâyeti hasebiyle zabt ve kabz eylemiş idi. Hâlâ vasiyy-i mezbûr vesâyet-i merkūme[den] fâriğ olup yerine vasî olup el-Hâc Hasan’ın zimmetinden muhallefât defteri mûcebince kabz eylediği malın muhâsebesi görülüp ba‘de’l-hesâb hâsıl olan ribh ile sarf eylediği akçeden gayrı altmış dokuz bin akçe gösterdiği zimemden kabûl edip yetîm-i merkūmun emvâline müte‘allik vasiyy-i mezbûr Hasan’ın zimmetini ibrâ eyledim dedikde mukırr-ı merkūmenin vech-i meşrûh üzre olan ikrârını merkūm Hasan kabûl edip bi’t-taleb kayd şüd. Şuhûdü’l-hâl: Muslihiddin b. Hasan, Mustafa b. Murad, Ahmed b. Hasan en-Na‘âl, Abdülkādir b. Hüsam, Mehmed b. Abdullah ve gayruhüm mine’l-hâzırîn.