Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 213 Hüküm no: 311 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Odabaşı b. Abdullah’ın terekesinin vârisler arasında sulh yolu ile paylaşıldığı Bundan akdem mahmiye-i Galata mahallâtından Bereketzâde mahallesinde sâkin olup Talende nâm mevzi‘den gelir iken fevt olan Hasan Odabaşı b. Abdullah nâm müteveffânın sulbî oğlu Abdülkādir nâm sagīre kıbel-i şer‘den vasî olan Müderris Mevlânâ Mehmed Efendi b. Mahmud ve müteveffâ-yı mezbûrun sulbiye kızı Âlime ve zevcesi olan Aynî Hâtun bt. Sinan mahzarında takrîr-i kelâm verip dediler ki müteveffâ-yı mezbûrun muhallefâtından hâsıl olan nukūd mâbeynimizde tevzî‘ ve taksîm olunup lâkin mezbûre Aynî Hâtun mahalle-i mezbûrede inde’l-ahâlî ma‘lûmetü’l-hudûd mülk menziline zevci müteveffâ-yı mezbûru bazı binâ ihdâs eylemişdi. Zikr olunan binâdan ve müteveffâ-yı mezbûrun muhallefâtı içinden dahi evinde halı ve kilim ve velense ve sahan ve tencere ve sâir esbâb her ne ise kalîl ve kesîr mâbeynimizde tevzî‘ ve taksîm olunmasını taleb eyleriz dedikde mezbûre Aynî Hâtun ile husûs-ı mezbûra müte‘allik münâza‘ât-ı kesîre ve muhâsamât-ı şedîde vâkı‘a oldukdan sonra muslihûn mütevassıtûn olup es-sulhu seyyidü’l-ahkâm ve senedü’l-hükkâm fehvâsıyla amel olunup zikr olunan binâ ve esbâb mukābelesinde mezbûr Aynî bedel-i sulh bize beş bin akçe verdikden sonra mezbûre Aynî Hâtun’un husûs-ı mezbûra müte‘allik da‘vâ ve nizâ‘ olursa lede’l-hükkâmi’l-kirâm mesmû‘ ve makbûl olmaya dedikde mukırrûn-ı mezbûrûnun vech-i meşrûh üzre olan ikrârlarını mukarrun-lehâ’l-mezbûr Aynî Hâtun vicâhen tasdîk ve şifâhen tahkīk edip mâ vaka‘a kayd-ı sicil olundu. Tahrîren fî evâili Cumâdelûlâ sene 999. Şuhûdü’l-hâl: Fahrü’s-sâlihîn Mevlânâ Hüsameddinzâde b. Hasan eş-şehîr bi Gulâm, Abdi b. Hüseyin, Ali Çavuş b. Toyran, Bayram b. Hüseyin, Bayram b. Abdullah, Mehmed Ağa b. Yusuf, Mahmud Çelebi b. Mehmed, Mehmed b. Mustafa ve gayruhüm mine’l-hâzırîn.