Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 216 Hüküm no: 318 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Davud Bey’in bıraktığı miras ev üzerinde, kocası Mehmed Reis b. Şaban’ın yarım hisse hak talebi Mahmiye-i Galata hâricinde Kasımpaşa mahallâtından Kulaksız Ahmed mahallesinde bundan akdem vefât eden ve verâseti eşhâs-ı âti’z-zikre münhasıra olan Meryem bt. Davud Bey nâm hâtunun zevci olan işbu hâmiletü hâze’l-kitâb Mehmed Reis b. Şaban nâm kimesne müteveffât-ı mezkûrenin li eb ve üm karındaşları Ahmed ve Mustafa nâm kimesneleri ve vâlideleri Âişe bt. ( ) nâm hâtunu meclis-i şer‘a ihzâr ve mahzarında takrîr-i kelâm edip mahalle-i mezbûrede vâki‘ olan bir tarafı tarîk-i hâs ve bir tarafı papucî Bayram ve [bir tarafı] Ahmed mülkü ile ve bir tarafı mezbûr Davud Bey mülkü ile ve bir tarafı Mustafa b. Ahmed mülkü ile mahdûd olup bir fevkānî ve bir tahtânî evi ve bir mikdâr bahçeyi müştemil olup mezbûrların yedinde olan menzil-i mezbûru Davud Bey hâl-i hayâtında ve kemâl-i sıhhatinde zevcim müteveffât-ı mezbûre için cihâzlık hibe-i sahîha-i şer‘iyye ile hibe edip müteveffât-ı mezbûre dahi alıp kabz edip yedi yıl mikdârı menzil-i mezbûrda sâkine olup müstakillen mutasarrıfa olmuş idi. Hâlâ vefât edip menzil-i mezbûrun nısfı bi hasebi’ş-şer‘i’ş-şerîf bana intikāl eylemişdir. Hisse-i şer‘iyyemi taleb eylerim. Suâl olunsun dedikde gıbbe’s-suâl menzil-i mezkûru merkūm Davud Bey müteveffât-ı mezbûreye hibe edip müteveffât-ı mezbûre tasarruf ettiğin inkâr ile cevâb vericek müdde‘î-i mezbûrdan da‘vâsına mutâbık beyyine taleb olundukda udûl-i müslimînden Hüsameddin b. Mehmed ve Mustafa b. Abdullah ve el-Hâc Yusuf b. Abdullah ve el-Hâc Ali b. ( ) nâm kimesneler li ecli’ş-şehâde meclis-i şer‘a hâzırân olup fi’l-vâki‘ menzil-i mezbûru kızım mezbûre Meryem için binâ edip mezbûre Meryem’e hibe-i sahîha ile hibe edip ol dahi alıp kabz eyledi. Merkūme Meryem’in mülküdür deyû merkūm Davud Bey hâl-i hayâtında ve kemâl-i sıhhatinde bizim huzûrumuzda ikrâr ve i‘tirâf ve merhûme Meryem dahi menzil-i mezbûra yedi yıl mikdârı mâlikâne tasarruf? eyledi. Vech-i meşrûh üzre edâ-i şehâdet-i şer‘iyye eylediklerinde mûcebince hükm olundu. Tahrîren fî evâsıtı Cumâdelûlâ li sene tis‘a ve tis‘îne ve tis‘a mi’e. Şuhûdü’l-hâl: Ali b. Himmet el-İmâm, Sefer b. Murad, Mahmud b. Reis b. Mustafa, Behcet Bey b. Abdullah, Kurd b. Abdullah, Ramazan b. Abdullah, Kenan b. Abdullah, Abdullah b. Fethullah ve gayruhüm mine’l-hâzırîn.