Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 221 Hüküm no: 331 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cemile bt. Hamza’nın, Yunus Bey b. Abdullah’a borcuna karşılık evini verdiği Mahmiye-i Galata hâricinde merhûm Muhyiddin Çelebi mahallesinde sâkine Cemile bt. Hamza nâm hâtun tarafından bey‘-i âti’z-zikri tasdîka zümre-i silahdârân zümresinden Firdevs b. Abdullah ve Süleyman b. Abdullah nâm kimesneler şehâdetleriyle hasm-ı şer‘î-i câhid mahzarında vekâleti sâbite olan zümre-i mezbûre[den] İzzet Mustafa Bey b. Abdullah nâm kimesne mahfil-i kazâda işbu hâmilü’l-kitâb mezkûr hâtunun zevci olup zümre-i mezbûreden olan Yunus Bey b. Abdullah nâm kimesne muvâcehesinde ikrâr-ı sahîh-i şer‘î edip bundan akdem müvekkilem mezbûre Cemile merkūm Yunus Bey’den on dokuz bin nakid-i fıddî râyic fi’l-vakt akçe istikrâz edip mahalle-i mezbûrede vâki‘ bir tarafı Ömer b. Ahmed ve Yeniçeri Ahmed mülklerine ve bir tarafı Sultan Hâtun mülküne ve bir tarafı Ali b. Bâli mülküne ve bir tarafı tarîk-i âma müntehî olup iki süflî evi ve bir su kuyusunu ve bir mikdâr havluyu ve kenîfi müştemil olup merhûm Sultan Bayezid Han vakfı’na yılda dört akçe mukāta‘a-i arzı olan mezbûre hâtunun mülk menzilini yeniden yapıp meblağ-ı mezbûru menzil-i mezkûrun binâsına sarf eylemiş idi. Hâlâ mezkûre Cemile deyn-i mezbûr on dokuz bin akçeyi dâyin-i mezbûra edâdan âciz olmağın menzil-i mezkûru cemî‘ hudûduyla mezbûr Yunus Bey’e yirmi bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip semen-i mezbûrun on dokuz bin akçesini zimmetinde olan on dokuz bin akçe deyn-i mezbûra mukāssa edip bâkī bin akçesini mezbûr Yunus Bey yedinden alıp kabz edip teslîm-i mebî‘ eyledi dedikde mukırr-ı mezbûru ikrâr-ı meşrûhasında mezbûr Yunus Bey bi’l-muvâcehe tasdîk edip mâ hüve’l-vâki‘ ketb olundu. Tahrîren fî evâhiri Cumâdelâhire sene tis‘a ve tis‘în ve tis‘a mi’e. Şuhûdü’l-hâl: Mahmud b. Muharrem el-İmâm, Mahmud b. Şehsuvar el-Müezzin, Hüseyin b. Ali el-Müezzin, Mustafa b. İsmail, Mehmed b. Ömer, Ali Bey b. Abdullah, Mehmed b. Ali er-Reis, Aydın b. Abdullah, Aydın Abdullah et-Tabbâh, İbrahim b. Ahmed, Mehmed b. Ahmed el-Bevvâb, Abdurrahman b. Pervâne, Mehmed b. Ali, Ahmed Topî, Kaya b. Ahmed, Mehmed b. Abdullah, Ahmed b. Nasuh, Ali b. Pervâne ve gayruhüm mine’l-hâzırîn.