Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 222 Hüküm no: 332 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mehmed’in, Fâtıma bt. İbrahim’le olan arsa davasından vazgeçtiği Hüseyin b. Mehmed mahfil-i kazâda Meryem bt. el-Hâc Mehmed’in kızı Fâtıma bt. İbrahim nâm sagīreye vasî olan işbu hâmilü’l-kitâb Mehmed b. Mehmed nâm kimesne mahzarında ikrâr ve i‘tirâf edip dedi ki müteveffât-ı mezbûrun Câmi‘-i Kebîr mahallesinde lede’l-cîrân ma‘lûmetü’l-hudûd mülk arz-ı hâliyesine müte‘allik bazı da‘vâ ve nizâ‘ olmuş idi. Hâlâ zikr olunan yere müte‘allik da‘vâdan fâriğ olup hisse bin kırk akçe alıp kabz eyledim. Ba‘de’l-yevm husûs-ı mezbûra müte‘allik da‘vâ ve nizâ‘ olursa lede’l-hükkâm mesmû‘a ve makbûle olmaya dedikde vasiyy-i mezbûr merkūm Hüseyin’in ikrârını bi’l-muvâcehe tasdîk edip mâ vaka‘a kayd-ı sicil olundu. Tahrîren fî evâhiri Cumâdelâhire sene 999. Şuhûdü’l-hâl: es-Seyyid Ahmed Efendi b. es-Seyyid Mehmed, Perviz Bey b. Abdullah, Mehmed b. Abdullah, Mustafa b. Murad, Ahmed b. Ali ve gayruhüm mine’l-hâzırîn.