Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 223 Hüküm no: 334 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin vasisi tarafından Maruc v. Sadya’ya verilen borcun ödenmemesi halinde rehin olarak alınan evin satılması Ahmed b. Ali nâm sagīrin vâlidesi ve vasî olan Ümmügülsüm bt. Receb mahfil-i kazâda işbu hâmilü’l-kitâb Maruc v. Sadya nâm Yahudi mahzarında takrîr-i kelâm edip dedi ki vasîsi olduğum sagīr-i mezbûra babası müteveffâ-yı mezbûr Ali’den intikāl eden hisse-i şer‘iyyesinden yirmi beş bin nakid akçe istiğlâl tarîkiyle doksan sekiz Şa‘bânı’nın gurresinden doksan dokuz Şa‘bânı’na gelince mu‘âmele-i şer‘iyye eyleyip merkūm Yahudi’ye vermiş idim. Hâlâ meblağ-ı merkūm yirmi beş bin akçe iki bin akçe mu‘âmelesiyle cem‘an yir[mi] yedi bin akçe olur. Mezbûr Yahudi (…) nâmına olduğu için taleb eylerim dediğinde cevâb verip ben doksan sekiz Şa‘bânı’na değin alıp mu‘âmele eylemişimdir. Tamâm, olmayınca kādir değilim dedikde vasiyy-i mezbûr Ümmügülsüm târih-i kitâbdan iki ay müddet ta‘yîn edip meblağ-ı merkūmu mezbûre Ümmügülsüm’e merkūm Yahudi verip teslîm eylemek üzre ikrâr edip eğer vermezsem rehin vaz‘ eylediğim evi bey‘ edip vereyim dedikde bi’t-taleb kayd-ı sicil olundu. Tahrîren fî evâhiri Cemâziyelâhir li sene 999. Şuhûdü’l-hâl: Ahmed b. Hüseyin, Rüstem b. Abdullah, Yahya Çelebi b. Mehmed, Mehmed b. Mustafa, İbrahim b. Hasan ve gayruhüm.