Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 225 Hüküm no: 336 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mezid’in, ölen el-Hâc Kemal b. Mehmed’den alacaklı olduğu Kostantıniyye’de görülen da‘vâdır Bundan akdem Mahmiye-i Kostantıniyye mahallâtından Mercan Ağa mahallesinde fevt olan el-Hâc Kemal b. Mehmed nâm müteveffânın vârislerinden zevcesi Fâtıma bt. Mezid tarafından husûs-ı âti’z-zikre dahi vekîl olup vekâleti bimâ hüve tarîkü’s-sübût şer‘an sâbite olan işbu hâmilü’l-hurûf fahrü’l-akrân Yahya Çelebi b. Mehmed nâm kimesne mahfil-i kazâda müteveffâ-yı mezbûrun li eb ve üm karındaşı İsa b. Mehmed vasiyy-i muhtâr olan Seydi Yusuf nâm kimesne takrîr-i kelâm kılıp dedi ki müvekkilem mezbûre Fâtıma’nın zevci müteveffâ-yı mezbûr zimmetinde karz-ı şer‘îden on bin akçe hakkı vardır. Vekâletim hasebiyle meblağ-ı merkūmu müteveffâ-yı mezbûrun muhallefâtından bi hasebi’ş-şer‘i’ş-şerîf taleb ederim dedikde gıbbe’s-suâl ve’l-inkâr ve’l-işhâd udûl-i müslimîn ve sikāt-ı muvahhidînden Mehmed b. Ali ve Ramazan b. Hasan nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûr hâl-i hayâtında ve kemâl-i sıhhatinde zevcem mezbûre Fâtıma’ya karz-ı şer‘îden on bin akçe deynim vardır dediğinde şâhidleriz, şehâdet dahi ederiz dediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâki‘ olup mûcebiyle hükm olundu. Tahrîren fî evâsıtı Cumâdelâhire sene 999. Şuhûdü’l-hâl: Yahya b. Ebûbekir, Mehmed b. el-Hâc Halîfe, Mehmed b. Ali el-İmâm, Sinan b. Nasuh, Süleyman Çavuş b. Abdullah ve gayruhüm mine’l-hâzırîn.