Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 229 Hüküm no: 344 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seydi b. Yusuf’un, ölen el-Hâc Kemal b. Mehmed’le ortak oldukları, ortağına verdiği orta akçesinin varlığını vârislerin kabul ettiği Bundan akdem mahmiye-i Kostantıniyye mahallâtından Mercan Ağa mahallesinde fevt olan el-Hâc Kemal b. Mehmed nâm kimesnenin şerîklerinden Seydi b. Yusuf nâm kimesne mahfil-i kazâda müteveffâ-yı mezbûrun li eb ve üm karındaşı İsa ve zevcesi Fâtıma bt. Mezid tarafından vekîl olan Yahya b. Mehmed ve sâir şerîklerinden İlyas b. Mustafa ve Bâli b. Memi ve Tenbel b. Mustafa ve Yusuf b. Kābil nâm kimesneler mahzarlarında takrîr-i kelâm ve tebyîn-i merâm kılıp dedi ki asl-ı mâl benim müteveffâ-yı mezbûr ile mezbûrûn zimmetinde orta akçesi kendi hakkım yetmiş bir bin altı yüz akçe hakkım vardır. Hâlâ müteveffâ-yı mezbûr fevt olmağla zikr olunan akçemin zuhûr etmesini taleb eylerim dedikde gıbbe’s-suâl ve’l-inkâr ve’l-istişhâd udûl-i müslimîn ve sikāt-ı muvahhidînden Halil b. Himmet ve el-Hâc Haydar b. Abdullah ve Emrullah b. Kılıç ve Rıdvan b. Abdullah nâm kimesneler meclis-i şer‘a li ecli’ş-şehâde hâzırûn olup fi’l-vâki‘ mezbûr Seydi’nin orta akçesi yetmiş bir bin altı yüz akçesi vardır. Zikr olunan akçenin müteveffâ-yı mezbûr zimmetinde olup kendi ağzı ikrârına şâhidleriz, şehâdet dahi eyleriz deyû edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ oldukdan sonra zikr olunan akçeyi merkūm Seydi Bey’in şerîkleri olan mezbûrûn kimesnelere suâl olundukda onlar dahi fi’l-vâki‘ merkūm Seydi’nin zikr olunan akçe ortada akçesi vardır dediklerinde vâki‘ hâl zabt-ı makāl için tahrîr olundu. Hurrire fî evâhiri Cumâdelâhire sene 999. Şuhûdü’l-hâl: Fahrü’l-kuzât Bâli Efendi, Süleyman Çavuş b. Abdullah, Hüseyin b. Gazanfer, Bâli b. Seydi, Mustafa b. Hasan, Mehmed b. Yusuf ve gayruhüm.