Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 230 Hüküm no: 345 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Kemal b. Mehmed’in vârislerinin, el-Hâc Kemal’in ortaklarının zimmetindeki alacağı tahsil ettikleri Mahmiye-i Kostantıniyye’de kazasker efendinin emriyle görülen da‘vâdır. Bundan akdem mahmiye-i Kostantıniyye mahallâtından Mercan Ağa mahallesinde fevt olan el-Hâc Kemal b. Mehmed nâm kimesnenin li eb ve üm karındaşı İsa kendi tarafından asâleten ve kız karındaşları Nâsıra ve Şâhbula nâm hâtunlar cânibinden vekâleten müteveffâ-yı mezbûrun zevcesi olan Fâtıma bt. Mezid tarafından vekîl olan Yahya b. Mehmed nâm kimesneler mahfil-i kazâda müteveffâ-yı mezbûrun şeriklerinden vasiyy-i muhtârı olan hâssa kilercilerinden Seydi Bey b. Yusuf ve İlyas b. Mustafa ve Bâli b. Memi ve Yusuf b. Kābil ve Tenbel b. Mustafa nâm kimesneler mahzarlarında takrîr-i kelâm ve tebyîn-i merâm kılıp dediler ki mûrisimiz müteveffâ-yı mezbûrun ortakları mezbûrûn zimmetlerinde kendinin baldan ve yağdan ve sâir dükkânda olan metrûkâtdan hak taleb eyleriz deyû mezbûrûn ile münâza‘ât-ı kesîre ve muhâsamât-ı şedîde vâki‘ olmağın mâbeynlerine muslihûn-ı mütevassıtûn olup “es-sulhu seyyidü’l-ahkâm ve senedü’l-hükkâm” fehvâsıyla amel olunup müteveffâ-yı mezbûrun şerîkleri merkūmûn zimmetlerinde ve dükkânda vâki‘ olan metrûkâtdan mezbûrûnun rızâlarıyla on bin akçe ve sülüs dahi beş bin akçe cem‘an on beş bin akçe olur meblağ-ı merkūmu mezbûrân Yahya Çelebi’ye ve karındaşı mezbûr İsa’ya verilmek üzre ibrâ ve iskāt olunup ve müteveffâ-yı mezbûrun dâyinlerinden Mustafa Ağa b. Abdullah nâm kimesne karz-ı şer‘îden iki yüz sikke altın isbât edip eline hüccet-i şer‘iyye aldıkdan sonra meblağ-ı mezbûru dahi orta akçesinden ihrâc olunup mezbûrlar husûs-ı mezbûru kendileri uhdelerine aldıkdan sonra kayd olundu. Tahrîren fî evâhiri Cumâdelâhire sene 999. Şuhûdü’l-hâl: Bâli Efendi b. Mehmed el-Kadı, Süleyman Çavuş b. Abdullah, el-Hâc Hüseyin b. Gazanfer, Bâli b. Seydi, Mustafa b. Hasan, Mehmed b. Yusuf, Mustafa b. Ali ve gayruhüm.